Shillong, Jylliew 28: U Bah Pynsngianglang Syiem Chairman jong ka KHADC u ba dei ruh u Chairman jong ka “Advisory Committee on Legislation and Legal Issue” mynta ka sngi u la khot ia ka jingialang jong ki syiem ki Sirdar ha Khasi National Dorbar Hall Mawkhar ban ia mir jingmut ha kaba ia dei bad ka Instrument of Accession (IOA) bad ka Annex Agreement (AA).
Haba kren ha ki nongthoh khubor ha dien ka jingiamir jingmut u Bah Syiem u la ong ba, kala don ka jingkyrpad na ki Syiem ba ia kum kane ka jingialang dei ban pynlong ruh ha ki hima na ka bynta ban pynshai paidbah ban ia sngewthung ia kane ka dulir kaba la ia soi hapdeng ki 25 tylli ki hima bad ka sorkar India ha u snem 1947 bad ha u snem 1948 kiba long ki dulir kiba don kam.
Haba la kylli hato kine ki dulir ki dang im ne em ia mynta, na ka liang jong u Bah Syiem u ba dei u Chairman jong kane ka Committee u la ong ba kine ki dulir ki dang im namar haduh mynta kam pat don kano kano ka jingpynkylla ia ki, hynrei kala don ka jingleh klet ia kine ki dulir kiba don kam tam.
Ha ka juh ka por u la ong ba baroh ki nongialam na duh ki dkhot jong ka Federation of Khasi State, u Bah JJN Nichols Roy, ter ter kila ialeh la ka jong ka bynta ha kaba ia dei bad kane ka juh ka phang ban iada ia ka jaidbynriew katkum ka jingsngewthuh ka jong ki katkum ka jingtyllum jong ka por.
La iathuh ba ka ei kaba kane ka committee ka lah ban leh ka long ba hadien ba la dep ban pynshai paidbah halor kane ka IOA bad AA kin sa shna ia ka koitphot bad ai sha ka Executive Committee jong ka KHADC bad ha dien kane kin sa peit ia kaei kaba kin sa iaid sha khmat.
