Shillong, Kyllalyngkot 22: Ban peit ba ha kane ka elekshon sha ka iing dorbar thawa ain ka jylla kan long kaba iaid beit iaid ryntih bad ban khanglad ia ki jingiarah pisa ksiar palat ia ka T.50000 /- tyngka ki pulit kila pynrung ia ki jingkhynra syndet syndet ha kylleng.
Ki pulit jong ka Umsning jong ka Ri Bhoi District kila pynlong ia ka jingkhynra ia ki kali ha surok bah ha Umsning bad ha kane ka jingkhynra la ioh ban bat ia kawei ka kali Alto 800 kaba don ia u number AS 01DT 6749 na kane ka kali la ioh kurup san tylli ki biskit ksiar.
Kitei ki biskit ksiar la ioh ban kurup na ka met jong u Sahidul Islam bad ar ngut ki bala don lang bad u ki pulit kila kem bad kurup ia ka kali ha katei ka juh ka jaka bad ia kane la pyntip sha u District Election Officer jong ka Ri Bhoi District ban leh ia kaba don kam.
Ia kine ki ksair kiba la iohkem la phah thew ha ka dukan bania jong u bah Binsing Kharphuli kaba dei ka dukan ksair B Kharphuli haka jingdon lang u Assitant Returning Officer- Elections bad ki nongsakhi.
Kine ki ksiar kiba la ioh ban kurup ki khia haduh 570 gram bad ka dor jong kine ki ksiar kila kot sha ka T.30 lak tyngka ha dien ba la dep ban thew la song ia ki da kaba shon dur bad ring Bideo da u Additional Superintendent ki pulit ka Ri Bhoi District bad iaki la buh ha Malkhana jong ki pulit Ri Bhoi District ban leh ia kaba don kam.
