Shillong, Naiwieng 12: U Symbut Myntri Rangbah ka jylla u bah Prestone Tynsong haba jubab ia ka mat ia kren 
kaba la wanrah da u bah George B Lyngdoh halor ka jingorpaid ka jingkieng ha Dwar Khsuid, u myntri u la ong ba katba ym pat shna ia ka jingkieng dewbilat yn shna shipor da ka jingkieng nar ban iaid ki kali.
U bah Prestone u la ai khublei ia u MLA jong katei ka jaka u ba la wanrah ia kane ka phang ban ia kren hapoh ka iing dorbar, la pyntip ba na ka liang jong u u la khot ia ka jingiakren ia ki briew jong ka NAHAI halor kane bad kala don ka jingjurip kaba bniah.
Ha dien ka jingiakren bad ki bor jong ka NAHAI ban pynlait ia kane ka jingeh ia shipor la shim ia ka rai ban shna noh da ka jingkieng nar bad ia kane la bthah ia u Secretary jong ka PWD bad ia u Chief Engineer jong ka National Highway ba kin bud dien ia kane bad kin pyntip sha u man ka taiew.
Haba ia dei bad ka jingkieng Umiam kaba iaid mynta u myntri u la ong ba katkum ka jingai jingtip kaba la ai na ka MeECL ka jingkieng ka lah ban kit haduh 40 tone ia mynta wat la ka rta jong kane ka jingkieng kala don mynta la 50 snem.
Haba ia dei bad ka jingduh jong ka surok Shillong bypass bad ka surok bah Shillong Guwahati la ong ba kane ka dei hapoh ka jingpeit jong ka tnad ka kit ka bah jong ka sorkar pdeng ha kaba peit da ka NAHAI, na ka liang jong ka NAHAI kala ong bas hem kin sa sdang noh ban maramot ia ka jingduh jong kine ki surok kam dei hapoh jong ka PWD jong ka sorkar jylla.
Ha ka por ba wanrah ia kane ka mat ia kren na ka liang jong u bah George B Lyngdoh u ka kynnoh beit ba ka jingduh jong kine ki surok bad kane ka jingkieng ha Dwar Ksuid ka dei na ka jingkhwan myntoi jong ki katto katne ngut na ka daw jong ka jingkit palat pud jong ki trok.
U bah George u la ong hata ka tnad ka kit ka bah jong ka sorkar jylla kaba don ia ki jaka thew kam tip ma ba ki don ki kali kiba la kit palat pud bad da ka jingleh jong ki ki paidbah mynta ki hap ban jynjar haduh katne ha ka leit ka wan ha kane ka sor Shillong bad ka Ri Bhoi District.
