Shillong, Risaw 21: Ki don palat 73 tylli ki par tihmaw bad 42 tylli ki kor tyllait maw ne crusher kiba la ioh jingbit na u Syiem Jirang ban tih maw bad kumjuh ki kor ban tyllait maw ha thain khappud bad ka Assam ha ki snem ba la dep kynthup ka Rani Jirang, Gunpaty, Mairapur, Amjowshrei, Iomurohrim, Ampynsem gura bad kiwei.
Katkum ka kaiphod ba la wanrah ha ka dorbar hima ha ka 12 tarik Risaw 2024, ha New Jirang la lap ba bun ki parmaw ne quary ba la ai jingbit ka hima ki dei jong ki myntri bad ki nongtrei ha ophis hima Jirang bad kattno katne ki rangbah shnong, ki don ruh kiba paw kyrteng saw san tylli kawei ka iing kiba trei quary ha ka kyrteng ka lok bad ki khun jong ki.
Kumjuh ki kor tyllait maw ne crusher na ki 42 tylli ba la ai jingbit bun ki dei jong ki myntri bad ki nongtrei ka hima kiba pyntrei ha kyrteng ka lok bad ki khun jong ki kiba la pyntrei mynta la bun bun snem ha khappud ka jylla Assam.
Ha ka thup kyrteng ba 42 ngut ki briew ba buh crusher ha Jirang, kawei ka kyrteng u dkhar ba la ithuh kyrteng u Depok Barua na Rani ka pawlang ba ula ioh jingbit na ki bor hima ban buh crusher bad kane ka paw ki bor synshar hima ki la iaid lait ia ka riti synshar.
Kum ban pynpaw ia kine ki parmaw bad ki kor tyllait maw ba la ai jingbit ka hima ha Jirang la pyntrei bad pyniaid da ki khar na Assam la bun bun snem ha kyrteng ki khasi kaba long kumba ai kamai spah ia ki dkhar katba ki Khasi ki dei shu shah kyrteng bad nalor kine ki don kiba la shu pyntrei kumto khlem ka jingtip ki bor hima.
Ka jingai bor ka hima ban tih maw ryngkat ki kor tyllait maw ha kine ki snem ba la dep ka la pynjot thiaw ia ki lum ki wah hapoh ka hima Jirang bad kumjuh ia ka mariang bad lada kane jingkhlong maw kan bteng biang hadien ba la khang da ki bor sorkar ka long ka jingma ia ki khun ki hajar ka hima.
Ki bor pyniaid ka hima ki dei ban pyrkhat bha ia kane ka kam lada kan plie biang namar bun ki jaka ka hima Jirang ki la leit sha Assam bym don ki mawpud bad mynta wat ki lum ba la madan na ka jingtihmaw bad khyndew kin leit noh sha Assam.
Ha kajuh ka por ka kaiphod ka iathuh ki don 13 tylli ki furniture Unit ne sawmill ba la ai jingbit u Syiem ha kine ki snem ba la dep, bad nalor kine ki don kiba la shu pyntrei be-ain khlem ka jingtip ki bor hima la kynnoh ban ioh shalan tuh ia ki dieng sawdong sha Assam, kane ka long katkum ka kaiphot kaba la wanrah hapoh ka dorbar hima kaba la long ha ka 12 /10/2024 ha Jirang.
