New Delhi, Iaiong 05: Ka tnat Information & Broadcasting ka la pyndonkam kyrkieh ia ka bor hapoh ki kyndon IT, 2021 ban ai hukum ha ka 04.04.2022 kaba iadei bad ka jingkhang ia arphew ar tylli ki tyllong ai khubor kiba iaid lyngba ka YouTube, lai tylli ki twitter account, kawei ka Facebook account bad kawei ka website kaba pathai khubor.
Kine ki channel YouTube ki don palat 260 klur ngut ki nongpeit bad la pyndonkam ia ki ban pynsaphriang ia ki khubor lamler, bad ka jingpynsaphriang ia ki khubor thok lyngba ka social media shaphang ki kam kiba ktah ia ka jingshngain jong ka ri, ka jingiadei ka India bad kiwei kiwei ki ri bad ka shongsukshongsain ha ka ri.
Kane ka dei ka sien kaba nyngkong ba la pynshitom ia kanokano ka tyllong khubor ba pyndonkam ia ka YouTube naduh ba la pynbna ia ki kyndon IT, 2021 ha u Rymphang jong une u snem ba la dep. Lyngba ka hukum halor kane kajingkhang ba dang shen, khatphra tylli ki tyllong khubor YouTube na India bad saw tylli na Pakistan ki dei kiba la shah khang.
La pyndonkam shibun tylli ki channel YouTube ban pynmihia ki khubor thok kiba kren shaphang ki kynhun shipai jong ka ri, ka Jammu & Kashmir bad kiwei kiwei. Ki khubor ba la phah khang ki kynthup ruh ki comment kiba long pyrshah ia ka India kiba la mih ha ki rynsan social media kiba pyniaid na Pakistan.
La lap ba ki don katto katne ki khubor thok ba la pynmih da kine ki channel YouTube na India kiba iadei bad ka jinglong jingman mynta ha Ukraine bad kiba thmu ban pynkulmar ia ka jingiadei jong ka India bad kiwei kiwei ki ri.
Kine ki channel YouTube na India ki ju pyndonkam ia ki rukom treikam bad ki logo jong kiwei kiwei ki channel pathai khubor ba ju pyni ha ka TV, kaba kynthup ia ki dur jong ki nongpule khubor jong kine ki channel khnang ban pynthikna ba ki briew ki ngeit ia ka jingshisha jong ka khubor ba ki pynmih.
La pyndonkam ia ki thumbnail kiba thok bad la pynkylla ia ki thumbnail jong ki video khnang ban pynsphriang shuh shuh ia ki khubor lyngba ka social media. Ha katto katne ki case, la lap ba ki khubor kiba long pyrshah ia ka India ki dei kiba mih na Pakistan.
Lyngba kane ka jingpynshitom, naduh u Nohprah 2021, ka tnat ka la bthah ban khang haduh 78 tylli ki channel pynmih khubor ha YouTube bad kiwei kiwei ki account social media namar ka jingktah ia ka jingshngain jong ka ri, ka jinglong trai bad ka burom jong ka India, ka jingshongsukshongsain bad kiwei kiwei.
Ka Sorkar ka kut jingmut ban pynthikna ba ki khubor kiba mih online ki dei kiba shisha bad kiba shngain bad ban tehlakamiakanokano ka jingpyrshang ban ktah ia ka jingshngain ka burom, ka shongsuk shongsain, ka jingiada ia ri, ka jingiadei bad kiwei kiwei ki ri bad ka shongsuk shongsain jong ka India.
