Shillong, Jylliew 17: Ka ophis jong ka Deputy Commissioner jong ka East Khasi Hills District mynta ka sngi kala pyntip ba kila don 8 ngut ki briew kiba la duh noh ia ka jingim na ka daw jong ka jingtwa khyndew bad 1 pat dang jah pat lap ia ka met jong u na shnong Kenmynsaw.
Ka ophis jong ka Deputy Commissioner jong ka East Khasi Hills kala pyntip ba ha shnong Dangar kiba la duh ia ka jingim ki don san ngut na ka jingtwa khyndew, ka kong Kyllity Langpen 32 snem, Ka Daphishisha Langpen 12 snem, u Daskhemlang Langpen 5 snem, ka Sa I Dawanbiang Langpen 3 nsme, u khyllung shynrang 6 bnai.
Ha shnong Kenmynsaw bala khlad ka kong Drit Byrsaw bad ba dang jah dei u bah Robina Kynter kine ki dei shi kurim, ka jingwat ia ka met jong u bah Robino bala shah ban ha kane ka jingtwa khyndew ka dang iaid kat haduh ba thoh ia kane ka khubor.
Kiwei kiba kiba khlad na ka jingtwa khyndew ki long ka Sonali Banai 7 snem na ka shnong Boro Ryngku, u A Nathan Dajel Sangma 12 snem na ka shnong Begora A kitei baroh kiba khlad ki hap poh jong ka Mawsynram Block.
Ki ar tylli ki iing kiba la shah pynjot mynta ka sngi, kawei ka iing jong ka kong R.Khongsit na Sohra kaba hap hapoh jong ka Bholaganj Block bad kawei ka iing jong ka kong Shidalin Suting kaba hap hapoh jong ka Mawkynrew Block.
Mynta ka sngi u Executive Director ka State Disaster Management Authority (SDMA) la pyntip ba kiba khlad na kane ka jingshah lynshop ha ka mariang kila don 18 ngut, kiba mynsaw 16 ngut, kiba dang jah 6 ngut, ki shong kiba la shah ktah ki long 607 tylli bad ki briew kiba la shah ktah ki long 5,43,686 ngut.
Ki iing kiba la shah pynjulor ki long 3,940 tylli, na kine kiba la jot lut ki don 256 tylli, kiba shuh jot malu mala ki don 3,409 tylli bad kiba jan jot lut ki don 78 tylli, ki District kiba la shah ktah ki dei ka EKH District, West Khasi Hills, SWKH District, Ri Bhoi, East Garo Hills District, West Garo Hills North Garo Hills, SWGH District, East Jaintia Hills bad West Jaintia Hills District.
