Shillong, Jylliew 26: Bah Teinwell Dkhar MDC jong ka Shella Konstitwensi hapoh jong ka KHADC la khlad mynta ka sngi ha dien jong ka jingshitom kaba la bat ia u katto kattne por, kum u MDC u la jop saw sien lynter kum u MDC na katei ka konstitwensi.
U Bah Teinwell u la jop nyngkong ka MDC ha u snem 2004 na ka party United Democratic Party (UDP) bad jop ha kine saw sien kum u MDC na ka juh ka party bad u la neh ha ka juh ka por haduh ka sngi jingkhlad noh ka jong u.
Ha kine ki 20 snem jong ka jinglong MDC, u bah Teinwell nalor ki kam kiba la bat kum u EM hapoh ka KHADC u la ioh ruh long kum u Chief Executive Member jong ka KHADC bad u la bat ruh ia ka kam kum u Chairman jong ka KHADC.
Shuwa ban poi sha ka sain pyrthei u bah Teinwell Dkhar u la long u nonghikai ha kawei ka skul hapoh ka shnong upper primary Presbyterian ha shnong Saitsnat ha West Khasi Hills District kaba mynta la hap hapoh jong ka South West Khasi Hills District.
Ka jingleh burom kaba khatduh kan long ha ka 28/Jylliew/2024 hapoh shong jong u ha Mawlong, kaba hap hapoh jong ka hima Mawlong Sirdarship. Kane ka jingkhlad noh jong u tei u rangbah kala wan rah ia ka jingduh kaba khaw ia ka iing ka sem bad ia ka konstitwensi baroh kawei.
