Shillong, Lber 27: U Executive Member (EM) uba dei peit ia ka tnad Trade, Enforcement, Labour bad Revenue u Bah Winston Tony Lyngdoh u khlem lah ban jubab halor ka jingiapher hapdeng ka Check Gate bad ka Toll Gate, hynrei u hap ban pan da ka notice halor kane ka bynta.
Kane kala wan ha ka kynta kylli jingkylli ia kaba la buh da u MDC jong ka Rambrai Jyrngam u Bah Lurshai Kharbani ha ka sngi sngi ba-ar jong ka dorbar mang tyngka jong ka KHADC.
Ha shwa jong kane u Bah Lurshai Kharbani u la buh jingkylli ba u kwah tip ia ka jingdon ki check gate hapoh ka Khasi Hills Autonomous District Council bad ka jubab na u Bah Winston ka long ba ki don saw tylli ba kynthup ar tylli ha East Khasi Hills bad ar tylli ha Ri Bhoi.
Shuh shuh u Bah Winston u la ong ba haduh mynta ka Executive Committee kam ioh jingtip halor ka jingdon ki check gate kiba bun ha ka thain Rambrai bad halor ka jingdon kine ki check gate bym ithuh da ka council u la pynpaw ba kin sa leh ia kaba donkam.
Bun na ki MDC kim shai ia ka jingmut ki Toll Gate bad ki iapher aiu na ki Check Gate bad haba ki la kylli ia kane, u Bah Winston ruh u la pynpaw ba um don jubab bad pan da ka Notice halor kane.
