Shillong, Nohprah 04: U Lamphang ka iing dorbar thawain ka jylla u Thomas A Sangma u la khot ia ka jingialang jong ka High Power Committee ban ia kren ia ka jingiaid sha phrang ka jingtei ia ka iing dorbar thawain ba thymmai ka jylla ha Mawdiangdiang.
Ha kane ka jingialang la don lang u myntri rangbah ka jylla u Conrad K Sangma, symbut myntri rangbah ka jylla, bah Prestone Tynsong bad u bah Sniawbhlang Dhar, nongialam ka liang pyrshah u Dr. Mukul Sangma, u MLA bah Charles Pyngrope, MLA bah Lahkmen Rymbui, bah Banteidor Lyngdoh, u Chief Secretary bah D.P. Wahlang, IAS, Assembly Commissioner bad Secretary Dr. Andrew Simons bad ki heh sorkar.
Ha kane ka jingialang u Lamphang ka iing dorbar la pyntip ha ka HPC ba la pynjlan shuh ia ka por ban pyndep ia ka jingtei ia ka iing dorbar bad la khmih lynti ba ia ka dorbar synrai yn pynlong ha ka iing dorbar kaba thymai ha u snem 2025.
Ka jingslem ban pyndep ka long ba ki don ki jingshna kiba don kam ban hap ban leh bniah ban pynthikan ba kan nym don kano kano ka jingbakla ban pynthikna ba ka jingtrei lang kaba paka ba kan nym don kano kano ka jingbakla.
Ka jingshna kaba kyrpang kane ka iing dorbar thawain ka jylla ka dei ka Dome, kumba ka long mynta kam don kano kano ka jingpynwandur kaba kum kane ha lam shatei lam mih ngi ka Ri India, kumta kim kwah ban pyndep kloi ba kan nym don kano kano ka jingjia kumba la dep jia.
U myntri rangbah ka jylla u Conrad K Sangma la ong ba ka jingpynkhreh ka long kaba janai bha ba kan nym don kano kano ka jingjia kumba la dep ban jia la khmih lynti ba ia ka jingtei ia ka iing dorbar yn pyndep shuwa ka Dorbar synrai jong u snem 2025.
La ong ba ka jingkhia jong ka Dome kaba mynshuwa ka long 3,000 metrik tone bad kane ka jingshna ia ka Dome kaba thymmai ka jingkhia ka long tang 85 metrik tone bad ka jingshna kan long kaba janai bad ha kane ka iing dorbar kan don ki jaka kiba biang ia ki MLA, ki nongtrei bad ia ki seng sain pyrethei.
