Shillong, Nailur 01: U Chief Executive Member ka KHADC u bah Pyniaid Sing Syiem u la pyntip ba ka Executive Committee ka la rai ban shim ia ki sienjam ba tyngeh ba lah ban khang khyrdep lada ki Bank ki kyntait ban ithuh ia ki syrnot jong ka Council ba pynshisha ia ka hok longtrai ia ki jaka puta, haba ki paitbah ki kwah ban shim ram.
Haba ia kren bad ki nongthoh khubor hadien ba la wai ka jingialang bad ki heh jong ki bank ba pher ba pher. U la iathuh ba ha kane ka sngi la don lai tylli ki bank ki ba la wan ban iashimbynta ha ka jingialang ba la khot da u CEM bad kiba kynthup ia ka SBI, HDFC, bad ka AXIS hynrei kiwei ki Bank kum ka MRB bad Bank of Baroda bad katto katne tylli ki Bank ki khlem wan shuh namar ki la pyntreikam ia ki kot ba ai ka KHADC ban pynshisha iaka jinglong trai ia ki jaka.
U bah Pynïaid Sing Syiem ula iathuh ba ka EC ka la bthah ia u Deputy Secretary ba khmih ia ka tnat Land, ban bthah phah jingthoh sha baroh ki Bank ba ki dei ban ithuh ia ki kot ba ioh na KHADC ban pynshisha ia ka jinglong trai jaka puta katkum aiñ Khasi Hills Autonomous District Regulation and Administration of Land Act 2021.
katkum ka Section 8 clause 9, 10 ka kdew, Ka khyndew, ka dulir pynskhem, pata bad ki kot ki sla halor ka jinglongtrai ba la ai daka KHADC katkum ka Khasi Hills Autonomous District Regulation and Administration of Land Act 2021, kin dei ban ioh jingithuh bad kin dei ruh ki sakhi sabut halor ka jinglong trai ia ka khyndew bad ia kine ki kot dei ruh ban ithuh da ki Bank bad kiwei ki Financial Institution.
Haba jubah ki jingkylli, u bah Pyniaid ula ong ba ki don ki Bank kiba la kham heh bad kiba don la ki jong ki Regional Area kum ka Ri-bhoi, West Khasi Hills, Jaintia Hills bad kane ka lah ban don ka jingbym ioh jingtip ki nongpyniaid jong kine ki Bank haba iadei bad ka jingdonbor ka KHADC ban ai ia ki kot ki sla ban pynshisha ia ka jinglong trai iaka jaka.
U bah Pyniaid sing syiem u la ong ba jingialang mynta ka sngi bad ki Bank ka long ka khubor sha baroh ki Bank ba ka KHADC ka don ia ka bor haba iadei bad ka jingpynshisha iaka jinglongtrai iaka khyndew bad lada ki Bank ki dang kyntait ban airam, ym banse katkum ka aiñ Trading by Non-Tribal Act ka KHADC kan hap ban khang ia kitei ki Bank.
