Shillong, Naitung 01: U MLA ka Nongpoh Constituency u Bah Mayralborn Syiem mynta ka sngi ka 1 tarik u Naitung 2024 ki la ioh ban shong jingialng bad ka kynhun jong ki officers ka tnad ka koit ka khiah ban ia kren halor ka jingdon kam jong ka koit ka Khiah ha ka District Ribhoi.
Ha ba ioh ban ia kren bad ki nongthoh khubor na ka liang u bah Mayralborn Syiem u la ong ba na ka liang jong u, u la ioh ban pynsngew ia ki jingdon kam jong ka Koit ka Khiah sha ka Myntri ba dei peit ia ka koit ka khiah ha ka ban kyntiew noh ia ka Umshaken sub Center sha ka PHC bad kumjuh ruh ban kham bun ki Sub Center ha kiwei pat ki shnong jong ka dong ka Thain Ribhoi kum ha Mawlong, Umran, Sohkhwai, Shakhoikuna bad ha Nongpoh proper.
U la ong ruh ba ka jingdawa ban kyntiew kyrdan noh ia ka Umshaken subcenter sha ka PHC ha ka ba na ka liang ki borshnong ki la dep ban pynbiang ia ki kot ki sla bad na ka liang ka office jong ka DMHO ka Ribhoi ki la dep ban phah ia ka report sha poh ka Directorate bad ka basah mynta ka long ba satang na ka liang ka Sorkar kan ai ia jingmynjur ban kyntiew kyrdan noh ia kane sub center.
U bah Syiem u la ongruh ba lada ka liang ka sorkar kan kyntiew kyrdan ia kane ka subcenter sha ka PHC ki paidbah ki ba shong ba sah hapoh ka Raid Mathan kin ioh ia ka jingmyntoi na kane ka PHC.
U bah Syiem u la ioh ruh ban pynsngew ia ki jingdonkam ha ka ban pynbiang ia ki tiar ha poh ka Nongpoh Civil Hospital ha ka ba ka Nongpoh Civil Hospital ka dei ka ba la ai ka jingshakri sha baroh ki nongpang jong ka Ribhoi District.
U la ongruh ba ka Hospital ka don shibun ki jingduna ha ka ba na ka liang ki paidbah ki la dep ban phah ia ka jingpynsngew sha u Kum u MLA bad na ka liang jong u bah Mayralborn u la pyntikna ha khmat ki officer ka tnad ka koit ka khiah ba ka dei ban pynbiang ia ki jing don kam ha kane ka Hospital.
U la ong ruh ba haka ba iadei bad ki jingdon jong ki tiar jingsumar na ka liang jong u la pyntip ba shen ka sorkar kan sa ioh ban pynbiang ia baroh ki jingdon kam ha kane ka hospital.
U bah Syiem u la buh ruh ka jingkyntu ia jingkyntu ia ki Doctor ki ba don ha poh ka Civil Hospital ba kimdei ban phah than ia ki nongpang na poh ka Civil Hospital sha ki private hospital ha ka ba na ka liang jong u kum u nongmih khmat u la ioh bunsien ia ka jingai jingujor na ka liang ki paidbah halor kane ka bynta.
