Shillong, Risaw 23: Ka Deputy Commissioner jong ka East Khasi Hills District ka kong Isawanda Laloo mynta ka sngi kala khot ia ka jingialang ia ki nongialam niam, la khot ia kane ka jingialang ka long ban pan ia ka jingkyrshan na baroh ki jaidniam ban peit ba kan don ka shong suk shong sain ha kane ka jinglehkmen Durga Puja.
Ha kane ka jingialang kaba la long mynta ka sngi baroh ki nongialam niam kila ai ka jingkhublei kaba kyrpang ia ki paid riew ngeit Hindu bad kyrpad ia ki paidbah nongshong shnong ban duwai ba kane ka jinglehniam durga puja kan long kaba kaba jop bad ka jingsuk jingsain kan don ha ka jylla. Ki ai khublei kyrpang ruh ia ka Central Puja Committee.
Ha kane ka jingialang la don lang ruh u Superintendent ki pulit jong ka East Khasi Hills District, ki ADCs bad ki Magistrate ha ryngkat ki nongialam jong ka kynhun Shillong All Faith Forum,ki la don ruh ki nongialam niam Muslim, Sikh, ki nongialam niam khristan.
Ha kane ka sngi u president jong ka Central Puja Committee u Naba Bhattacharya u la ong ba ki paidbah nongshong shnong ka jylla Meghalaya, na baroh ki jaidbynriew ne ki niam la juh rakhe ia ki jingleh niam baroh da ka jingsuk jingkmen bad kum kane ka jingiakynduh kan phah ia ka khubor jong ka jingsuk wat ha ki por ki ban dang wan ruh kum juh.
Ha ka jingkren jong u Rev Phadar John Madur la ong ba kum ki nongshong shnong ki don kawei ka khubor ban phah kata ka long ka jingsuk bad jingialang kawei bad ka jingiatylli jong baroh ki jaidniam ban pynphriang ia kane ka khubor jong ka jingshong suk.
Na ka liang u Secretary jong Shillong Muslim League u Noor Nongrum u la pynpaw ba ai ka jingkhublei kaba kyrpang ha kane ka jinglehniam puja bad u ong ba kane ka jingleh niam kan long kaba suk ba sain bad ka suk ba kmen. Kiwei kiba la kren ha kane ka jingialang long u Rev Pastor GS Lytan, PCI, Rev R. Imiong, Church of God, Mr Hammarsing Kharhmar, Seng Khasi Kmie, Gurcharan Singh, President SGSS Gurudwara, Raj Bhavan, JL Das, General Secretary, CPC bad u Rev E Kharkongor, Secretary, Shillong All Faiths Forum.
Ha kane ka jingialang ka kong Isawanda Laloo DC jong ka East Khasi Hills kala ai khublei kyrpang ia baroh ki nongialam niam bad ia ki nongialam ka CPC kiba la ia treilang ban pynlong kaba iaid beit iaid ryntih ha kane ka jinglehniam Puja kala pynpaw ia ka jingsngewnguh ia baroh kiba la kren ha kane ka jingialang mynta ka sngi.
