Shillong, Jymmang 31: Ka PFR Football Academy kaba long kawei naki shlem ai jinghikai iaki khynnah shynrang bad kynthei hapoh ka jylla ka thmu ban pynlong iaka Women Football League ka ban sdang naduh 22 tarik Jylliew 2024 ha madan Malki kum shi bynta ban kyntiew iaka jingialehkai photbal jong ki kynthei hapoh ka jylla.
Haba ia kren bad u President jong ka Academy u Bah Franky Kharumnuid halor ka nongrim jong ka lympung, u la ong kumba ngi shem haduh kine ki sngi, ngi iohi ba kham bun ki lympung ki dei tang jong ki khynnah shynrang bad kham niar ban iohi iaki lympung jong ki kynthei ha sor Shillong lait noh tang ka League bala pyniaid daka Shillong Sports Association.
Kum ka Academy kaba don iaka thong ban kyntiew iaka photbal hapoh ka jylla lada dei jong ki shynrang ne kynthei, ngi shim ia kane ka sienjam ban pynlong iaka Women Football League kum shi bynta ban plie lad plie lynti iaki khynnah kynthei jong kane ka jylla kiba don iaka sap ka phong bad kiba ieid ia kane ka jingialehkai ba kin ioh iaka rynsan ban pynni iaka sap ka phong kaba ki don.
Halor kitei ki jingthmu jong ngi, ka Academy ka iawer iaki Club kiba kwah ban iashimbynta sha kane ka lympung jong ka Women Football League. Iaki form lah ban ioh na Meghalaya Print kaba don ha Malki Point hajan Seven Set School bad naka bynta ka online form hap ban phone ha kine ki number 8256983718 bad 9862215258.
Ka tarik ba khatduh ban pdiang iaki Team kan dei 14/ Jylliew/ 2024 iaki nongjop jong kane ka lympung yn ai khusnam daka pisa kaba long T20,000 bad kiba wan ba ar daka song tyngka kaba long T.10,000/-.
