Shillong, Risaw 28: U Syiem ka Hima Khyrim u Pa,Im Dr. Balajied Syiem u khot u wer ia ki paidbah ban ia shim bynta ha ka shad Nongkrem kaba la pynlong da ka hima shisien shisnem ka ban long ha ka 1 tarik bad 2 tarik u Naiwieng u bnai ban wan ha Smit.
Haba kren ha ki lat pathai khubor mynta ka sngi na ka liang jong u Syiem la ong ba kum ka hima ka pyndep ia ka jinglehniam kaba man u snem kaba kila ioh pteng naduh kip or hyndai hynthai naduh ba dang dei hapoh ka hima Shyllong, kaba ka jaka synshar ka dei ha Nongskeh.
Ha ka jingwan u phareng u la phiah ia ka hima Shyllong sha ki ar tylli ki hima, kata ka Hima Khyrim bad ka Hima Mylliem, ha kaba ka hima mylliem kala buh ia ka ophis trei kam ha Mawkhar.
Ka Hima Khyriem pat ha Nongkrem, dei ba pluhnoh ka iing ha Nongkrem ka Syiemsad ka kynriah noh ha Smit, dei na kane ba haduh mynta la neh ka nam shad Nongkrem haduh mynta mynne.
U Syiem ka Hima Khyriem la ong ba ia ka hima lah ban phiah hynrei ia ka niam ym lah ban phiah, ia kane ka niam kaba la ioh pateng naduh ki por hyndai hynthai la bat da ka Hima Khyrim bad la pynneh pynsah haduh mynta mynne.
Kane ka jinglah ban bat ryntih ia ka niam ka rukom ka pynisha ka pyrthei ba kum ka jaidbynriew ka don la ka jong ka tynrai, kum ka hima ka khot ka wer ia baroh ba kin ia wan ban ia shim bynta ha kane ka shad Nongkrem ka ban long ha ka 1 tarik bad 2 tarik u Naiwieng 2023.
Haba ia dei bad ka jinglut jingsep ki raid na ka hima ki kit kibah ban pyndep ia ka naim ka rukom hapoh ka hima bad kane ka jinglehniam kala dang iaid bad kin pynkut ha ka 2nd Naiwieng 2023 ryngkat ka pomblang.
U Syiem ka hima u la ai khublei kyrpang ruh ia ka sorkar kaba la juh iarap ia ka hima ha kine ki snem kiba la leit noh bad haduh mynta lyngba ka tnad shangsuwari bad mynta kila ioh ia ka jingiarap ban shna ia ki jaka shong ha Lumiewduh kaba ka jingtrei kala dep haduh 95%.
Ha ka jingshisha ka hima ka dang mut ban pan jingiarap na ka sorkar hynrei ha u snem bala dep ka jingwan jong u mytnri rangbah ka jylla u Conrad K Sangma ban ia don bynta ha kane ka jinglehniam u la kular ban bei pisa ban shna jaka shong ha lum Iewduh ba pynlong ia ka jingpom blang bad ka sorkar kala bei T.3.86 klur tyngka na ka bynta kaba nyngkong.
Ha kane ka sngi u Myntri B Sohtun ula bynrap nalor kaei kaba la kren da u Syiem ba kum ka hima ka kyntu ia kito kiba shna ia kano kano ka phlim ha kaba ia dei bad ka jinglehniam Hima Khyriem ki dei ban pyni shuwa sha ka Hima Shuwa ba kin pynliat paidbah ban pynthikna ba kane ka jinglehniam ym dei ban ialam bakla.
