Shillong, Kyllalyngkot 26: Ha ka jingkren jong u Lat ka jylla u C H Vijayashankar haba kyntiew ia ka lama jong ka Ri India ha Madan Polo ha ka jingrakhe ia ka 76th Republic Day la ong ba ka sorkar kala khroh ia ki riew shimet ban wan seng kam ha ka jylla ban ai kam ia ki samla ka jylla.
Katkum ka Meghalaya State Investment Promotion bad Facilitation Act 2024 bad ka State Industrial Policy, 90% kala buh ia ka bhah ba ia ki kam ban trei la mang haduh 90% ki kam na ka bynta ki trai jylla.
Ia ka Land Bank la pynwan dur katkum ka Meghalaya Transfer of Land (Regulation) Act, 1971 bad ki kyndon jong ki lai tylli Autonomous District Councils. Ka sorkar jylla kala kut jingmut ban kyntiew ia ka rai ka par bad khlem da ktah ia ka hok long trai ki trai shnong bad ban kyntiew ia ki samla ka jylla.
Ka sorkar kala shim ia ka rai ban pynioh iing ia baroh ki piadbah nongshong shnong naduh bala wanrah ia ka skhim PMAY(G) bad kumba ka long ha ka jylla la shna haduh 1.18 lak tylli ki iing na kitei kiba la mang la shna 82,995 ki iing ha ki nongkyndong ha kine ki ar snem bad ha ki jaka sor la dep ban shna 3097 na ki 4554 kiba la mang.
Ban kyntiew ia ki kam jngohkai pyrthei lyngba ka Meghalaya Tourism Homestay ka sorkar kan ai 70% ka jingiarap ban shna ia ki iing basa bad ka jingiarap kan nym palat ia ka T.7 lak tyngka, ia mynta kila Homestay kiba la dep ban shna ki long 600 tylli.
