Shillong, Risaw 08: Ka tnat Income Tax ha ka 05.10.2021 ka la pynlong ia ka jingthwet bad ka jingknieh ha kaba iadei bad artylli ki kynhun kiba na ka thain shatei lammihngi bad ka West Bengal. La pynlong ia kane ka jingthwet ha 15 tylli ki jaka ha Kolkata, Guwahati, Rangia, Shillong bad Patna.
Kawei na kine ki kynhun ka don kti ha ka jingshna dewbilat. Ha kane ka jingthwet, la lap ba kane ka kynhun ka la don ka jingkamai kaba khlem pyntip da kaba die jingdie khlem da kyntiew jingtip bad da kaba thok shaphang ki jinglut jingsep.
Ia kane ka jingkamai ba la buhrieh la thep biang ha ki kam lyngba ki kompani ba thok. Ki jingshem ha kane ka jingthwet ki pyni ba ki don ki kompani thok kiba pyniaid da kane ka kynhun na ka bynta ban plié lad ia kine ki kam beain ia kane ka kompani.
Haba leit jurip ia kine ki kompani, la lap ba kim don satia ha ki jaka ba la pyni ba la seng ia ki. Ha kane ka jingthwet, la lap ba ki don ki jingai ram ba thok, ki jingsiew ba thok, ka priemium ba thok lyngba kine ki kompani thok.
La lap ba palat T 50 klur ka long ka jingkamai ba la buhrieh. La lap ruh ba kane ka kompani ka la thok shaphang ki jingdon ki riewlum kiba ai shah ia ka na ka bynta ki jingsiew kiba kot kumba T 38 klur. La lap ruh ia ki dak jong ka jingdon ia ki bank account bad ki jingdon jingem ha kiwei kiwei ki ri ia kaba kane ka kynhun kam shym la ai jingtip.
Kawei pat ka kynhun ka dei kaba trei kontrak rel ha Assam, Mizoram bad kiwei kiwei ki bynta ka thain shatei lammihngi. Ha ka jingthwet, la knieh ia ki jingsakhi, ki kot ki sla bad ki jingtip ba la buh ha ki lad digital kiba pyni ba la don ka jingbei tynka bym shym la pynpaw ha ki jaka ki puta.
La lap shibun ki dulir die khyndew ha kaba ka dor ka lah ban kot palat T. 110 klur. Ha ka jingthwet, kane ka kynhun kam shym la lah ban ai jubab halor ki tyllong kamai jong ka kiba plié lad ia ka ban thied ia kine ki jaka. Shuh shuh, la lap ia ki jingpynshisha ia ki jingthep jingsei pisa kiba palat T. 13 klur ha ka jingdie ia ki jaka.
Lyngba kane ka jingthwet bad ka jingknieh, la lap ba ka jingbuhrieh ia ki jingkamai ka long palat T. 250 klur. La knieh ruh ia ka pisa kaba palat T. 51 lak ia kaba kine ki kynhun kim lah ban batai ki ioh naei. La set dam ruh ia khyndai tylli ki locker ha ki bank. Ka jingjurip ha kane ka bynta ka dang iaid shakhmat.
