Shillong, Rymphang 11: Mynta ka sngi ki “ASHA Facilitator” kila khot ia ka jingialang ban ia kren halor ki jingdawa kia la dep ban phah sha ka sorkar la bun snem ia kaba ka sorkar ka khlem patiaw ei ei ban pynurlong ia ki dawa jong ki.
Ka kong I K. Mujat President ka seng ASHA Facilitator la ong ba namar ka sorkar kam shym la sngap ia ka jingdawa jong ki, kum ka seng kala shim ia ka rai ba kin sdang ia ka jingsangeh trei kam naduh ka 25 /2/2022 mynta u bnai.
Ki jingdawa kiba la dep ban phah sha ka sorkar ki long san tylli, kaba ha khmat eh ka long ba ka sorkar ka dei ban pynkiew noh ia ka tulop jong ki, ban pynkiew ia ka tulop jong ki man ka snem.
Haba ia dei bad ka bai leit bai wan ruh dei ban pynkiew ruh ia kiwei ki jingsiew ha kaba ia dei bad kiwei ki kam kaba ka tnad ka koit ka khiah ka phah ia ki khamtam ha kane ka jingiakhun pyrshah ia ka khlam COVID-19.
Ki ASHA Facilitator kila dawa ruh na ka sorkar ban siew ia ka bai sumar haba ki pang ki shitom, ym tang ia ki nongtrei hynrei wat ia kiba ha iing ha sem ruh kum juh ban siew ia ka bai dawai na ka bynta jong ki.
Ia kane ka jingdawa la dep phah sha ka sorkar naduh u snem 2021 bad ia kane ka juh ka jingthoh la phah ruh sha u Director ka tnad ka koit ka khiah ban dawa ba ka sokar ka dei ban pynioh ia ki jingdawa ki ASHA Facilitator, kine kiba trei ha kane ka kam ki don kumba 340 ngut ha ka jylla baroh kawei.
