Shillong, Nailur 12: Ki nongtrei sngi hapoh jong ka Meghalaya Sport Council kind ang beteng ia ka jingiakhih jong ki kaba la sdang ha ka 27 tarik jong u bnai ba la dep ban dawa na ka sorkar ba ka dei ban pynkiew ia ka bai bylla sngi jong ki.
Ka kong Marsilin Marwein, ryngkat ka kynhun haba kren mynta ka sngi ha Shillong Press Club ha ki lad pathia khubor kala iathuh ba ka jingiakhih ka jong ki ka long ban dawa na ka sorkar ban pynkiew ia ka bai bylla sngi na kaba ki ioh mynta T.5000/- tyngka shibnai.
Ki nongtrei kiba ia shim bynta ha kane ka jingiakhih baroh ki long 50 ngut, na ki 61 ngut kaba ki don ha kane ka nongbah Shillong. La iathuh ba ha u snem 2015 ruh kila pynlong ia kum kane ka jingiakhih ba ki sa ioh ia ka bai trei kaba T.5000/- tyngka bad mynta ki iakhih biang ban dawa ia ka bai trei jong ki ban pynkiew.
La iathuh ba kane ka jingiakhih jong ki ka long ha dien ba kila dep ban phah ia ki jingthoh sha ka sorkar la bun bun sien hynrei ka sorkar kala leh kum bym ioh sngew ia ka jingdawa jong ki namar ba ka sorkar kam sngap kim don lynti shuh da kumwei hynrei ki hap ban pynlong ia kane ka jingiakhih.
U bah Thomas Passah na ka liang jong ka KHNAM u la ong ba kum ka party ka iarap ban ia kren ia kine ki jingeh jong kine ki nongtrei katkum kum ki kyndon jong ka ain,kaba dei katkum ka Labour Law kaba ka sorkar jylla hi kala pynmih ia ka dor ban siew ia ki nongbylla sngi.
