Shillong, Lber 25: Haba pyrkhat shaphang ka jingmaian u Khasi Hyndai,ka long shisha ka jingsarong,ka jingphuh mut phuh mat ba u Hyndai u da buh nongrim kaba skhem halor ka jaitbynriew jongngi. Ka jaitbynriew Khasi kadei ka jaitbynriew ba la jied hok shisha da u Trai Nongbuh Nongthaw.
Ha u Lum Sotpetbneng, ha u Khasi, ka dei ka pharshi halor ka jingtieng rasong ia ka Hok ha kaba u Hynniew ha tbian bad u Khyndai na jrong ki dang ia kiew ia hiar na kata ka jingkieng ksiar mynba dang kynthong ka pyrthei.
Nangta pat, sa wan tyllup sa ka Diengiei,kaba pharshi ia ka jingtyllup ka pap ka sang,ka jingwan mih u laiphew ksuid laiphew khrei bad sa mih sa ki thaw-ar,ka thaw bynriew ka buh bynriew,ka raibi bad ka tyrud ka smer,etc.Dei ynda la wan u Khraw jutang na krem ‘lamet na krem ‘latang ba u Khasi u sa nang ban buh sa ia ka khein ka bishar bad ka knia ka khriam.
Hyndai,u Khasi u lah ban ia kren thik thik bad la u Trai Nongbuh Nongthaw.Lada U Blei u lah ban pynpaw ialade halor u Lum Sinai,hato, kam lah mo ban long ba ba U Blei U la pynpaw ialade,ha u Khasi, halor u Lum Sohpetbneng ne halor u Lum Shyllong? Ka jingkyntang ka Wah Jordan kam shym la iapher bad ka jingkyntang ki Khyndai Umdih ki Khyndai Umtong. Lehse,u Diengsning Khasi u kham kyntang pynban ban ia u dieng Kedar.
Ka ‘Lamet ka ‘Latang bad u ‘lasier lehse, ki kham kyntang pynban ban ia ki Diengtlai. U khun Khasi u sa iakren pat bad U Trai Kynrad lyngba ki dak ki shin ha ka dur jong Kem – ka Lar, lyngba ka Liengshat ka liengkhein.
U bishar ruh ha ki san,ki hynniew ne khyndai dkhot ne ha u rwieng jong u Khraw Jutang,ne ha kiwei pat ki dak ki shin jong ka Khein ka Bishar hakhmat U Nongthaw U Nongbuh. Namarkata, kam dei satia kaba suk ban shu ia kheinkai khien dew thala ia ka sap ka phong bad jingmaian stad Blei u Khasi Hyndai.
