Guwahati, Risaw 09: U Myntri Sorkar Pdeng ba dei khmih ia ka tnat kam poh iing bad Cooperation, u Amit Shah mynta ka sngi u la pyniaid ia ka jingialang plenary meeting kaba 70 jong ka North Eastern Council ha nongbah Guwahati, Assam.
U Myntri Sorkar Pdeng ba dei khmih ia ka tnat Culture, Tourism bad Development of North Eastern Region, u G. Kishan Reddy bad u Myntri Khynnah ka tnat Development of North Eastern Region bad tnat Co-operation.
U B.L. Verma, ki Lat bad ki Myntri Rangbah jong ki jylla ka thain shateilammihngi ha ryngkat ki ophisar jong ki tnat bapher bapher jong ka Sorkar Pdeng bad ki jylla ka thain shateilammihngi ki la iadon lang ha kane ka jingialang.
Ha ka jingai jingkren jong u, u Amit Shah u la ong ba ki don lai tylli ki jingeh kiba heh kiba la don da ki phew phew snem ha ka jingiaid lynti ka thain shatei lam mihngi sha ka roi ka par ka jingthombor ki kynhun lehnoh, ka jingduna ki lynti rel, ki surok bad ka jingpyniasoh lyngba ki kad liengsuin ha ka thain bad ka bad ka jingbym don ka jingtrei borbah na ka bynta ka roi ka par jong ka thain shateilammihngi da ki sorkar kiba la leit.
Hynrei hapoh ka jingialam jong u Myntri Rangbah Duh, u Narendra Modi, ka Sorkar India ka la shim shibun ki sienjam ha kine ki 8 snem ba la dep ban wanrah ia ka shongsukshongsain ha ka thain shateilammihngi, ban kyntiew ia ki lad pyniasoh bad ban peit bniah ia ka roi ka par jong kane ka thain.
U Myntri ka tnat kam pohiing u la ong ba baroh kawei ka India ka ithuh ba ka ktien, ka deiriti, ka bam bad ki riam jong ka thain shateilammihngi kum ka pateng bad ka sorkar kaba ialam da u Myntri Rangbah duh, u Narendra Modi ka kut jingmut ban pynnehpynsah bad kyntiew ia ka thymmei jong kane ka thain. U la ong ba ha kine ki 8 snem ba la dep, ka Sorkar ka la pyrshang ban pynbeitia baroh ki jingeh jong ka thain shateilammihngi da kaba tih naduh na tynrai ia kine ki jingeh.
U Amit Shah u la kyntu ia ki Myntri Rangbah jong ki jylla ka thain shateilammihngi ba kin pyndonkam ia ka jingtip NESAC na ka bynta ka jingpynbeit ia ka jingshlei um, ka jingpynbiang um ha ki jaka rep, ki kam jngohkai, ka jingthungdieng bad ki kam rep. U la ong ba ki Myntri Rangbah jong ki jylla ka thain ki dei ban thung ia u nodal officer ia ka NESAC ha ki jylla jong ki khnang ban ioh pyndonkam bha ia kane ka rynsan.
U Shah u la ong ba ka Sorkar Pdeng ba ialam da u Myntri Rangbah Duh, u Narendra Modi ka ngeit ba ka roi ka par kaba pura jong ka ri ka lah ban urlong tang lyngba ka jingshim lang ia baroh ki ktien jong ka ri bad ba la buh ia ka bynta ha ka National Education Policy ba thymmai ba dei ban ai jinghikai ia ki khynnah rit da kaba pyndonkam ia ka ktien tynrai.
U Amit Shah u la ong ba ka ioh ka kot jong ka India mynta ka don ha ka kyrdan kaba san ha ka pyrthei bad ka jingpyniaid bha ia ka pisa da ki jylla ka thain shateilammihngi ka long kaba donkam ban kyntiew ia kane sha ka kyrdan kaba ar ha ka pyrthei.
Da kaba kdew sha ka jingdonkam jong ki kam rep kiba lait na ka jingpyndonkam ia ki dawai bad ka jingpyndonkam ia ki kam digital ha ki kam rep, u Shah u la ong ba kane ka long ka kam kaba kongsan ia ka Sorkar India bad ka kam ban seng ia ka multi-state cooperative society da kaba pyniasoh ia ka Amul bad 5 tylli kiwei kiwei ki cooperative ban ai jingithuh ia ki mar rep ba lait na ki dawai ka la sdang.
U la ong ba hadien ba kine ki mar ki la ioh jingithuh, kane ka cooperative society kan pynthikna ia ka jingshalan ia kine ki mar, khnang ba ka jingiohnong kan leitbeitbeit sha ki bank account jong ki nongrep. U Shah u la ong ba palat 500 tylli ki laboratory ha kylleng ka ri kin ai jingithuh ia ka jinglong jingman jong ka khyndew bad ki mar rep ba lait na ki dawai.
U Myntri ka tnat kam poh iing u la ong ba ka thain shateilammihngi kaba laitna ka jingshlei um bad ki drok ka long kaba kongsan bha ia ka Sorkar ba ialam da u Myntri Rangbah Duh, u Narendra Modi. Ha kaba batai shaphang ki sienjam ban iada na ka jingshlei um.
U Shah u la ong ba ka jingthmu jong ki hydro power plant kam dei tang ban pynmih bordingelektrik, hynrei lah ruh ban pyndonkam ha ka jingiada na ka jingshlei um, nalor ka jingpyndonkam ia 271 ki jaka shong um kin iarap ban iada na ki jingshlei um. U la kyrpad ban pyllait ia ki jylla ka thain shateilammihngi na ka jingpyndonkam ia ka single use plastic ban iada ia ka mariang.
