Shillong, Jymmang 24: U Chief Executive member jong ka KHADC, u Bah Teinwell Dkhar u la ong ba kito ki Hima kiba khlem pat don iing dorbar kin leit ban ia kynduh ia ki MDC jong ki, na ka liang jong ka District Council kan nym lah ban ai iing dorbar.
Kane ka jubab jong u CEM ka KHADC ka long halor ka jingkylli, la ka KHADC kan iarap ne em ia kito ki Hima kiba khlem pat don iing dorbar na kane ka jingmang pisa ba kyrpang jong ka sorkar pdeng sha ki District Council.
Ban pynkhlain ia kane ka jingong na ka liang jong u CEM, u la ong “ Nga hapoh jong ka Shella Konstitwensi kaba nga mihkhmat, da kaba nga ioh ia kane ka jingmang pisa kaba kyrpang nga la shna lai tylli ki iing dorbar ha ki elaka kiba hap hapoh ka konstitwensi jong nga”.
Ha ka juh ka rukom haba la mang ia ka pisa sha ki MDC ka dei ka kam jong ki hima ba kin leit ia kynduh ia u MDC jong ki ban pan ia ka jingiarap, na ka liang jong ka District Council kan nym lah ban iarap, ai ki hima kin leit sha ki MDC kaba ki ki hap ban ia kynduh bad ki u la ban biang.
Kiwei ki mat jingiakren ha ka EC kaba la long mynta ka sngi ka long ban pynkhlain noh ia ka Information Technology jong ka Council, ban pynkhlain ia ka tnad Ri Dohkha, ka EC kala shim ruh ia ki rai ha kaba iadei bad ka khyndew, ha kaba la pynkiew ia ka bai register khyndew na ka T.10 tyngka sha ka T.200 tyngka. Ban register pat ia kiba hapoh ka shiakar kan long T.2000 tyngka, ia kiba shiakar haduh shiphew akar sha neng kan long T.5000 tyngka.
Haba ia dei pat bad ki karkhana kiba heh ka bai register kan long T. 5 lak tyngka, ia kiba pdeng kan T.2.5 lak tyngka bad ia kiba rit kan long T.10,000 tyngka. Naka bynta ban shna iing katba ym pat lah ban ia pynbeit bad ka sorkar ka KHADC kan ai da ka jingthoh sha ki briew kiba don kam tang ia ki iing kiba long ka G+3 kaba mut ka khrum bad lai mala ka iing.
Ka EC mynta ka sngi kala rai ruh ban pynlong biang ia ka tamsa “Monilith Festival” tang ba ia ka tarik ym pat buh bad kum juh ia ka jaka ruh kim pat rai. Halor kane u CEM u la ong ba kin dang ia pan jingmut la ka long ne em ban rah ruh ia kane ka tamasa sha kiwei ki jaka ruh.
Haba ia dei bad ka jingpan u DC Nongstoin ban pynthymmai ia ka Nongstoin Town Committee, u Bah Paul Lyngdoh EM ba dei peit ia kit won committee u la ong ba kin sa leh ia kane da kaba wan rah ia ka jingpynkylla ha ka AD Rule ha kaba ia dei bad ka jingjied ia ki nongkit kam, ia mynta ka EC kan wan rah shuwa da ka Executive Order halor kane.
