Shillong, Iaiong 10: Ka Kong Chiarmon Dkhar ka long kmie na ka shnong Wapungskur, East Jainta 
Hills mynta ka sngi ka la pyndep lut ia ki kam leh isynei jong ka ia ki long ing long sem ba duk ba kordit kiba don ha ka shnong Wapungskur, East Jaintia Hills, ia kiba la shah ktah jur bha na ka daw jong ka jingpakhang shnong ha ka Ri India, na ka daw jong ka jingpang-khlam COVID-19, da kaba pynkut haka sngi Palei ha ka Dong Moopynieiñ.
Ha ka sngi Balang, ka Chiarmon Dkhar kum shi bynta ka jingiaid bteng jong ka ban iarap isynei iaki long iing ba duk ba kyrduh, ka la leit ai jingiarap sa ha ka Dong Tpepswer. Ha kane ka dong la don haduh 88 tylliki ki long ing kiba la ioh jingiarap mar 15 kilo u khaw, u phan bad ka mluh.
Ha shuwa ban sam iaki tei ki mar bam sha kitei ki long ing, la ioh ia ka jingkren sngewnguh bad ruh jingduwai lyngkot na u Chairman jong ka dongTpepSwer, u tynmen basan bah Tarson Siangshai. Ha ka sngi Palei ka Kong Chiarmon Dkhar, ha ka jingbteng ia kane ka kam leh-isynei jong ka, ka la leit ai jingiarap shuh shuh sa ia ki long iing baduk jong ka Dong Moopynieiñ.
Ha kane ka dong la don kumba 115 tylli ki long iing kiba la ioh mar 15 kilo u ukhaw lem bad u phan bad ka mluh. Ha kane ka dongruh, shuwa ban sam ia kitei ki mar bam sha kitei ki longing, la ioh ia ka jingkren lamkhmat bad kyntien sngewnguh na u Chairman ka dong, u Bah Cheerful Ryngkhlem, bud sa ka jingduwai lyngkot na u tynman basan na u bah Shatbha Ryngkhlem.
Da kane ka jingwan ai jingiarap jong ka Kong Chiarmon Dkhar sa ha ka dong Moopynieiñ, la pyndep lut mynta ka sngi ia ki kam leh-isynei jong ka hapoh jong kashnong Wapungskur. Kat kumba long haduh mynta, la don haduh 340 tylli ki long ing long sem baduk jong ka shnong Wapungskur, kiba la ioh jingiarap da ki mar bam na ka Kong Chiarmon Dkhar tad haduh mynta ka sngi.
Kum ban shu pynkynmaw, ka Kong Chiarmon Dkhar, na ka shnong Wapungskur, ka briew kaba kylluid mynsien bha iaki kup shilliang semshilliang, hadien ba ka la iohi da la ki jong ki khmat halor ka jingshah ktah jur jong ki long iing long sem baduk bakyrduh na ka daw jong ka jingpakhang shnong jong ka Ri India, kiba im da kaba bylla nongsngi na kti ha ktien.
Ka kong Chairmon ha la ka bor bar it jong ka shimet, kum ka riew kynthei paidbah, ka la kner ia la ka jong ka ktii synei jong ka da kaba sdang naduh ka 2 tarik u Naitung na ka Dong Umchongpet bad pynkut shuwa artad ia kane mynta ka sngi ha ka Dong Moopynieiñ, jong ka shnong Wapungskur.
Ka jingdon ka Kong Chiarmon Dkhar, ha ka shnong Wapungskur, ka riew kynthei kaba don ia ka mynsiem isynei barabor ia ki kup shilliang sem shilliang, ka la long shisha ka jingkyrkhu kaba khraw haduh katta katta iaki long ing long sem bad duk bakordit jong ka shnong Wapungskur, kiba da la ia kynduh mawsiang na ka daw jong ka jingpang-khlam COVI-19.
