New Delhi, Niaiwieng 23: Ka India kaba pynmih 231 million ton ka dud ha ka shi snem ka dei ka ri kaba pynmih bun tam ka dud ha kaba ka don ka bynta kaba kumba shi pawa ha ka jingpynmih duh ha ka pyrthei.
Lyngba ki cooperative, la pyniasoh ia ki million ngut ki nongrep bad la tei ia ka rynsan jong palat 1.7 lakki cooperative society kiba trei ha ki kam dud ha ka ri kiba la tei ia ki jaka treikam kiba heh bha ha kaba lah ban pynkhreh 100 million liter ka dud ha ka shi sngi.
Kane ka jingjop ka dei namar ki hynniewphew snem ka jingtrei shitom bad ki sienjam da ki kynhun cooperative ha kylleng ka ri. Ha India, ka kam kaba iadei bad ka dud kam sahkut tang ha ka jingpynmih dud; ka long ka lad kam ai jakpoh ia palat 80 million tylli ki longiing, ka pynkupbor ia ki longkmie, ka pynbiang ia ka bam kaba tei bad ka jingshngain ha ka ioh ka kot bad ka long kum ka bor na ka bynta ka roi ka par jong baroh ha ki jaka nongkyndong.
Ka jingsdangia ka tnad Fisheries, Animal Husbandry, and Dairying kaba kyrpang ha u snem 2019, kaba la bud da ka jingsdang ia ka tnad Cooperation ha u 2021, ka pyni ia ka jingshaniah ka Sorkar Pdeng ia ka rukom treikam cooperative bad ka bor jong kane ban wanrah ia ka jingriewspah ha ka ri.
Kane ka la rah shakhmatia ka jingthmu”Sehkar Se Samridhi” kaba la pynkhlain ia ka kam cooperative ha ka ri. Ha tang lai snem, ka tnad ka la sdang ia ki sienjam ba heh na ka bynta ka roi ka par kaba pura bad kaba kynthup lang ia baroh ha ki kam cooperative.
Ki cooperative ba trei ha ki kam dud ha India, Ka India ka don palat 8 lak tylli ki cooperative society kiba trei ha ki 29 jait ki kam, kiba ai jingshakri ia jan 29 klur ngut ki dkhot. Hapdeng kine, ki cooperative kiba iadei bad ki kam rep, kum ki Primary Agricultural Credit Society (PAC), ki cooperative kiba trei ha ki kam dud bad kam ridohkha.
Ki don ka bynta kaba heh ha ka jingpynbiang ia ka imlang sahlang ha ki jaka nongkyndong ia ki lad sha ki iew, ka jinglah shim ram bad ki jingshakri teknikal. Kine ki cooperative ki plie lad ia ka jingthied ia ki tiar bad ka jingdie ia ki mar, da kaba pynthikna ba ki nongrep ki ioh ia ka dor kaba biang ha ki iew.
Mynta, ka rynsan ki cooperative jong ka India kiba trei ha ki kam dud ka kynthup 23 tylli ki state-level marketing federations bad ki kynhun kiba halor tam, 268 tylli ki union kiba iadei bad ki kam dud ha ki distrik, bad palat 1.44 lak tylli ki society kiba dang treikam ha ki shnong ha kaba don kumba 1.72 klur ki dkhot. Kane ka rynsan ka lum ia kumba 600 lak kilogram ka dud ha ka shi sngi bad ka die 440 laklitre ka dud ha ka shi sngi.
Ha ki cooperative kiba iadei bad ki kam dud, jan70% jong ki nongtrei ki dei ki longkmie. Kine ki cooperative ki ai ia ka longkmie ki lad kiba kyrpang na ka bynta ka jingpynkupbor ha ka imlang sahlang bad ka ioh ka kot. Ki ai mynsiemia ki longkmie ba kin long kiba skhem jingmut, kiba khlain ka jingmut jingpyrkhat bad kiba long ki nongialam.
Mynta ki longkmie ki don ka bynta kaba kumba 35% jong baroh ki dkhot jong ki cooperative society ha kaba 61 million ngut ki longkmie ki dei ki dkhot kiba dang treikam mynta. Shuh shuh kumba 48,000 ki cooperative kiba dei kyrpang na ka bynta ki longkmie ki dang treikam ha kylleng ka ri.
Kumjuh, ki Milk Producer Organization (MPO) ruh ki ai lad ia ki longkmie ba kin iadon bynta. Ka kam cooperative ha ki kam dud ha India ka dang kyllana ka ‘jingiashim bynta ki longkmie’ sha ka kam kaba ialam lynti da ka ‘jingialam ki longkmie’.
Ka jingkylla ha ki kam iatrialang, Ka thong kaba kongsan ka dei ban pynkhlain ia ka kam cooperative bad ban rah ia ka sha ki shnong ki thaw khnang ban pynurlong ia ka jingthmu”Sehkar Se Samridhi” jong u Myntri Rangbah Duh, Narendra Modi.
Hapoh ka jingialam jong u Myntri Sorkar Pdeng ba dei khmih ia ki tnad Kam Pohiing bad Cooperative, Amit Shah, ka tnad Cooperation ka la buh ia ka thong ban seng ia ki PAC ba (Primary Agricultural Credit Society) ba thymmai, ki cooperative kiba iadei bad ki kam dud bad ka kam ri dohkha ha ki panchayat bad ki shnong ki bym pat don ia kine.
Shuh shuh, ki PAC, ki cooperative kiba iadei bad ki kam dud bad ki kam ri dohkha kiba la don lypa ki dei ki ban shah pynkup bor shuh shuhlyngba ka jingkyrshan jong ka NABARD (National Bank for Agriculture and Rural Development), NDDB (National Dairy Development Board), bad NFDB (National Fisheries Development Board).
Ban khyllie im biang ia ki cooperative, ka la long kaba donkam bha ban pynkylla ia ki cooperative ha ki shnong sha ki kynhun kiba seisoh ha ka khaii pateng.
Ka long kaba donkam bha ba baroh ki panchayat abd ki shnong ki wan hapoh ka jingpeit jong ki PAC bad ki cooperative kiba iadei bad ki kam dud, ki kam ri dohkha kiba seisoh. Kane kanplie lad ia ki million ngut ki nongrep ba kin ioh ia kijuh ki jingmyntoi na ka roi ka par ha ka thain bad kan wanrah ia ka jingriewspah ha ki jaka nongkyndong.
Ki don kumba 2.7 lak ki gram panchayat (GP) ha ka ri. Kumba 1.6 lak ki gram panchayatkim don ia ka PAC (Primary Agricultural Credit Society), bad jan 2 lak ki gram panchayat ki dang duna ia ki cooperative society kiba iadei bad ki kam dud.
Ha kaba iadei bad kane, ha U Rymphang 2023, ka Kynhun Myntri jong ka Sorkar Pdeng ka la mynjur ia ka jingsdang ia 2 lak tylli kiPAC ki cooperative kiba iadei bad ki kam dud bad ki kam ri dohkha ha kine ki san snem ban wan. Ban pynthikna ia ka jingpyntreikam ha ka por kaba biang, u Myntri Sorkar Pdeng ba dei khmih ia ki tnad Kam Poh Iing bad Cooperation, u la pyllait paidbah ia ka Standard Operating Procedure (SOP) guide.
Katkum kane ka jingpynkhreh kam, ka NABARD kan sdang ia kumba 70,000 tylli ki multi-purpose PACS (M-PAC) ba thymmai, ka NDDB kan sdang bad pynkhlain ia kumba 1,03,000 tylli ki cooperative kiba iadei bad ki kam dud bad ka National Fisheries Development Board (NFDB) kan sdang 11,500 tylli ki cooperative kiba iadei bad ka kam ri dohkha. Shuh shuh , ki Sorkar jylla kin sdang ia kumba 25,000 tylli ki M-PACS, ki cooperative kiba iadei bad ki kam dud bad ki kam ri dohkha kiba thymmai.
Ha kine ki hynriewphew snem ba la dep, lyngba ki jingiatreilang jong ka NDDB bad ki sorkar Jyllabad ka Sorkar Pdeng, la sdang ia kumba 1.44 lak tylli ki cooperative kiba iadei bad ki kam dud kiba dang treikam mynta ha kylleng ka ri.
Mynta hapoh ka sienjam “White Revolution 2.0”, ka don ka jingpynkhreh ban sdang 1.03 lak tylli ki multi-purpose dairy cooperative society (M-DCS) ba thymmai ha ryngkat ka jingpynkhlain ia kito kiba la don lypa ha kine ki san snem ban wan. Kane kan dei ka jingjop kaba heh bad kan kyntiew bha ia ka kam pynmih bad kam sam dud ha ka ri.
Ki Multi-purpose PAC (M-PAC) ki la kylla sha ki jaka pdeng jong ka jingdie jingthied. Da kaba pdiang ia ki ain ba thymmai, kine ki society mynta ki pyniad 25 jait ki kam ba kynthup ia ki kam kiba iadei bad ka dud.
Ki Multi-State Cooperative ba thymmai: Na ki jaka trei sha ka pyrthei, La sdang lai tylli ki national-level multi-state cooperative ban pyniasoh ia ki cooperative ha ki shnong bad ki kam jong ka ri bad ki kam shabar ka ri, National Cooperative Organics Limited (NCOL) Bhartiya Beej Sahakari Samiti Limited (BBSSL), National Cooperative Export Limited (NCEL)
Kine ki sienjam ki dei ka dak jong ka sienjam ba heh ha ka histori jong ka kam cooperative ha India. Ki thmu ban pyniasoh ia ki cooperative bad ki iew ba kham iar, kyntiew ia ka bor treikam jong ki bad plie ki lad kiba thymmai na ka bynta ka roi ka par.
Da kaba peit ia ki mar organic, ki symbai ba bha, bad ka jingshalan mar, kine ki cooperative ki don ka lad ban pynpaw ia ki kam cooperative sha ka pyrthei, ka ban ai jingmyntoi ia ki nongrep bad ki jaka nongkyndon ha kylleng ka ri.
KaNational Cooperative Organics Limited (NCOL)ka thma ban shim ia ki lad kiba don ha ki mar organic bad wanrah ia ka jinglong jingman kaba koit ba khiah. KaBhartiyaBeejSahakariSamiti Limited (BBSSL)ka kyntiew ia ka jingpynmih, jingshna bad jingsam ia ki symbai kiba bha. Ha kajuh ka por, ka National Cooperative Export Limited (NCEL)ka trei ban kyntiew ia ka khaii pateng da ki cooperative bad kyntiew ia ki mar jong ka India ha kylleng ka pyrthei.
Ka NDDB ka dei kaba kongsan ha ka jingkyntiew ia ka NCOL. Ka jingsdang ia ka NCOL ka iahap bad ka ‘Rukom Treikam Baroh Kawei Ka Sorkra’, kaba don ka jingiatreilang jong baroh ki tnad Sorkar Pdeng ba don bynta ha ka kam bad ruh ki kynhun bapher bapher. Ka NCOL ka trei kum ka kynhun ban lum, thied, ai syrnot, test, brand, shna, buh bad pyniaid iew ia ki mar organic.
Kumjuh, ban kyntiew ia ka jingseisoh ki kam rep bad wanrah ia ka rukom treikam na ka bynta ka jingpynneh bad jingkyntiew ia ki symbai tynrai, la sdang ia kaBBSSLban pynmih, thied bad sam ia ki symbai kiba bha hapoh kawei ka brand lyngba ka rynsan jong ki cooperative. Ka BBSSLkan iarap ban kyntiew ia ka jingseisoh jong ki symbai ba bha ha India lyngba ki cooperative.
Ban wanrah ia ka jingithuh ha ka pyrthei ia ki mar cooperative, la sdang ia ka NCELkum ka kynhun ban plie lad ia ki shalan mar na ki kam cooperative jong ka ri. Kane ka komiti kan kyntiew ia ki sienjam jong ki cooperative ha ka kam rep, kam thung soh thung syntiew, kam dud, kam ri syiar, kam ri jingri, kam ri dohkha, kam shini, ki muslimusla, ki mar organic, ki sbohkhyndew bad kiwei kiwei.
Ki kynhun cooperative ki la tei ia ka nongrim kaba skhem ha ka ri. Lyngba ka jingiatreilang kaba kham bha bad ka jingpyndonkam kham bha ia kine ki jingdon jingem, lah ban kyntiew ia ka jingseisoh. Ban kyntiew ia ka ioh ka kot jong ki nongrep ba long dkhot, ki cooperative ki donkam ban pdiang ia ki rukom treikam ba thymmai.
Kine ki kynthup ia ka jingpyndonkam ia ki teknoloji ba thymmai, ka jingkyntiew ia ka jingseisoh ki kam, ka jingpyniar ia ki tyllong pynmih jingkamai, bad ka jingkyntiew ia ki jingiatreilang. Da kaba pyntreikam ia kine ki sienjam, ki cooperative ki lah ban peit ia ki lad kiba thymmai bad pynkhlain shuh shuh ia ka bynta jong ki ha ka ioh ka kot.
