Shillong, Iaiong 02: U National President jong ka National People’s Party (NPP) u Conrad K Sangma haba kren ha ka jingialap ilekshon ha madon polo ban ai ka jingkyrshan ia u kyrtong ka UDP u Dr Jemino Mawthoh kum u kyrtong MP na ka 1-Shillong Parliamentary Konstitwensi, u la ong ba ki National Party kin nym sngewthuh ia ki riewlum kiba don ha ki jylla jong ka North East.
Ha kane ka sngi u myntri rangbah u la ong ba ka long kaei kaei kaba sngewtynnad ban iohi ba wat hadpeng ka jingkhun para party ha ka por ilekshon MDC, hynrei kane ka mynsiem na ka bynta ka jaidbynriew la ia tylli lang kawei na ka bynta ka daw bah jong ka jaidbynriew bad ka jylla.
La ong ba ha kane ka sorkar MDA haba ki ialeh kaei kaei ki iarai lang kum ka kynhun dei na kane ka daw ba ka sorkar u Dr Mukul mynshuwa ka dei ka sorkar JCB bad kane ka sorkar MDA mynta ka dei ka sorkar Dumper, u la kyntu ia baroh ki kynhun MDA ba kin ia treilang kawei ban pynjop ia u Dr Jemino Mawthoh kum u MP.
Haba ia dei bad ka CAB, na ka liang jong u Conrad u la ong ba ka party Congress ka kop ba pyrshah ia ka CAB, hynrei dei ka MP jong ka seng Congress na ka jylla Assam kala thoh da ka jingthoh ban ai ka jingkyrshan ia ka CAB. Kum ki seng riewlum yn nym lah ban ieng marwei hynrei haba ieng kum ka North East baroh kawei ka sorkar pdeng ka hap ban sngap bad kam shym la lah ban pass ia ka CAB.
Haba ia dei bad ka North East u la ong ba ba ki sorkar na Delhi kila ong Look East bad kawei pat ka ong Act East, hynrei kita baroh ki khlem urlong, kaba kongsan ka long ba kum ki paidbah jong ka North East hap ban peit ia lade da la de la ong u Conrad myntri rangbah ka jylla.
