Shillong, Naiwieng 17: Khyndiat sngi hadien ba u Chief Executive Member ka Khasi Hills Autonomous District Council u la hiar ban khynra naphang ia ki dukan bar jylla ha ka thain Majai, ki 44 ngut ki nongkhaïi bar jylla kiba la leit tied jingkhang sha ka Meghalaya High Court namar ka jingbym ioh No objection Certificate, mynta ka sngi ka 17 tarik kila wan ban pyndem noh ha KHADC.
Kum ban shu kdew ka KHADC ha ka 5 tarik mynta u bnai kala hiar sha Majai bad Ichamati ban khynra naphang ïa ki dukan bar jylla ki bym biang ia ki kot ki sla ha kitei ki jaka. Kine ki nongkhaïi bar jylla kiba la wan ban pyndem ïa lade ha khmat ka KHADC ki wan kumba 12 ngut eiei kiba la kynthup lang ia ki exporter bad ki nongshong dukan.
Haba ia kren bad u Bah Pyniaid Sing Syiem u la iathuh ba kine kidei ki 44 ngut ki nongkhaïi bar jylla kiba la leit ban tied jingkhang sha ka Meghalaya High Court hadien ba ki shym la ïoh satia ï aka NoC na ka Hima Sohra na ka bynta ban pynthymmai ïa ki licence jong ki.
Napdeng kine ki 44 ngut, 20 ngut kidei ki exporter katba 24 ngut kidei ki nongkhaïi kiba kham rit kiba pan na ka bynta ban ïoh pynthymmai ia ka licence jong ki, hynrei namar ka jingbym biang ki kot ki sla kim shym la ioh satia.
U Bah Pyniaid u la ong ba kane ka jingwan ka jong ki ka long ba ki wan ban pyndem ia lade ha ka KHADC ha ryngkat ka jingkyrpad ia u CEM ban pynioh licence bad kila aiti ruh da ka shithi ban ioh pynthymmai ia ka licence ka jong ki.
Shuh shuh u Bah Pyniaid u la iathuh ba na ka liang jong ka Council, wat lada kine ki briew kila wan ban kyrpad ruh ka hap ban peit katkum ka aiñ ym ban shu ai khumar ia ka licence.
U Bah Pyniaid u la pyntip ruh halor ka jingshna Ïew thymmai jong ki suba pyniap ia u Bah Lurshai Hynniewta ha Ichamati kila leit ban seng ïew thymmai noh ha Khalipara u la ong ba ki dang ia ka jingujor bad tang shu ioh kin ym ai lad ia kitei ki bar jylla ba kin shu ia thaw iew katba mon.
