New Delhi, Naiwieng 10: Ka bynta kaba 54 jong ka International Film Festival of India (IFFI) ka la sdang bad 75 ngut ki nongshna phlim bad ki barikor ki dei kiba la shah jied na kylleng ka India ban iashim bynta ha ka bynta kaba lai jong ka sienjam 75 Creative Minds of Tomorrow.
La pynbnaia ka thup jong ki nongiashim bynta, ba la jied da ka kynhun ki nongbishar. Kine ki nongshna phlim kiba don sap ki dei na 19 tylli ki Jylla bad ki Union Territory jong ka India kiba kynthup ia ka Andhra Pradesh, Assam, Bihar, Delhi, Goa, Gujarat, Haryana, Jammu and Kashmir, Jharkhand, Kerala, Madhya Pradesh, Maharashtra, Manipur, Odisha, Punjab, Rajasthan, Tamil Nadu, Uttar Pradesh bad West Bengal. Kiba shah jied bun tam ki dei na Maharashtra, ba bud da ka Delhi, West Bengal, Haryana bad Tamil Nadu.
Ha ka jingkren shaphang ka bynta jong une u snem, u Myntri Sorkar Pdeng, u Anurag Singh Thakur u la ai khublei ia baroh ki nongjop bad u la ong, “Mynta u snem, ngi ioh biang sa 75 ngut ki nongpynmih prokram kiba don sap ha ki 10 tylli ki thup na kylleng ka ri ki ban iashim bynta ha ka 75 Creative Minds of Tomorrow”. U la ong ruh ba u khmih lynti ban iohiia ki phlim ba lyngkot ban pynmih kum shi bynta ka jingiakop pynmih phlim.
U Myntri u la ong ruh ba u kyrmen ba baroh ki nongjop kin ioh jinghikai na ki masterclass bad ki session ba la pynkhreh, kin sngewthuh ia ki kam pyniaid iew ia ki phlim haba ki iohi ia kane ka kam ha ka Film Bazaar, bad ki ioh ruh ia ki jingiadei kiba kongsan lyngba ka Talent Camp. “Kane ka sienjam ka dei kaba donkam bha ban pynkylla ia ka India kum ka jaka pdeng jong ka jingpynmih prokram ha ka pyrthei”, u la ong.
Mynta u snem ki nongiashim bynta kindon ruh na ki jaka ba kham kyndong jong ka ri kum ka Bishnupur (Manipur), Jagatsinghpur (Odisha) bad Sadarpur (Madhya Pradesh). Ia ka thup jong ki nongjop lah ban ioh ha ka website jong ka IFFI.
Ia kine ki 75 ngut ki nongiashim bynta la jied na 600 ngut kiba la kyntiew kyrteng bad kane ka jingjied ka shong ha ka jingtbit jong ki ha ki kam kiba iadei bad ka jingpynmih prokram kum ka – Direction, Scriptwriting, Cinematography, Acting, Editing, Playback Singing, Music Composition, Costume-and-Makeup, Art Design, and Animation, Visual Effects (VFX), Augmented Reality (AR) and Virtual Reality (VR). Ki don 18 ngut na ka thup Direction, 13 ngut na ka thup Animation, VFX, AR & VR bad 10 ngut na ka thup cinematography.
La ioh bun tam ki jingkyntiew kyrteng na ka thup Animation, Visual Effects (VFX), Augmented Reality (AR) and Virtual Reality (VR). Kane ka long katkum ka jingtrei ka Sorkar India ban pynkhlain ia ki kam AVGC-XR ha ka ri.
Katba bun na ki nongisahim bynta ki dei hapoh 35 snem ka rta, kaba khynnah duh ka dei ka ShashwatShukla na Mumbai, Maharashtra kaba dang 18 snem ha ka thup Music Composition/ Sound Design.
Kine ki 75 ngut ki nongpynmih prokram ha kane ka bynta kin iashim bynta ha kine ki bynta jong ka IFFI: Mynta u snem, yn pynlong ia ki masterclass ba la pynkhreh kyrpang ia kine ki 75 ngut ki briew ba don sap.
Ha ka masterclass halor ka kam Direction, u UmeshShukla un pyni ia ka jingpeit ia ka screenwriting bad directing ia ka Oh My God!, bad u scriptwriter, u Charudutt Acharyauba la trei slem bha ha ka Television, OTT bad ki phlim un ai jingbatai shaphang ka jingkylla ka rukom thoh script.
Ha ka master class shaphang ka animation, ka Charuvi Agrawal kaba la jop shibun ki khusnam kaba dei na ka Charuvi Design Labs kan ai jingmut shaphang ka jingiathuh ia ki khana jong ka India da kaba pyndonkam ia ka animation bad visual effects.
Shuh shuh, ka NFDC ka la pynkhrehia ka virtual masterclass bad u Florian Weghorn, Program Manager, Berlinale Talents u ban ai jingkren shaphang ka jingpyndonkam ia ki “Film Festival kum ki jaka ban ai rynsan ia kito kiba don sap”.
Kin ioh ruh ban iashim bynta ha ka bynta kaba kongsan shaphang ka jingpynbiang pisa na ka bynta ki phlim jong ki. Kin ioh lad ban ioh jinghikai na kine ki riewshemphang kiba trei ha kine ki kam.
Kin ioh lad ruh ban pyni ia la ki sap haba ki iashim bynta ha ka jingiakop ban pynmih ia ki phlimlyngkot kum shi bynta ka “48 Hour Filmmaking Challenge”. Lyngba kine ki phlim jong ki, kin pyni ia ki jingsngew jong ki shaphang ka “Mission LiFE” lyngba ka phlimlyngkot ba ki shna hapoh 48 kynta.
Ia kane ka jingiakop la saindur da ka NFDC ha ka jingiatreilang bad ka Shorts International, ka kompani na UK kaba don ka rynsan ha kylleng ka pyrthei na ka bynta ki phlimlyngkot. Ka Shorts TV ka don ruh ka thup kaba heh tam jong ki phlimlyngkot kiba lah ban peit lyngba ka TV, mobile, online bad ha ki theatre bad ka pynmih ruh ia ki prokram ba lyngkot lajong.
Ka jingialam sha ka Film Bazaar kanailad ia ki nongiashim bynta ba kin sngewthuh ia ka kam pyniaid iew ia ki phlim. Ka Film Bazaar ka bynta kaba iadei bad ka jingpyniaid iew jong ki phlim ha kane ka tamasa ka don ki bynta bapher bapher kum ka Co Production Market, Work In Progress Lab, Viewing Room, Screenwriters’ Lab, Market Screenings, Producers’ Workshop, Knowledge Series, Book to Box Office.
Ka bynta Book to Box Office mynta u snem kan don ia ka ‘The Story Link’ kum ka nongiatreilang ban ai rynsan ia ki nongthoh prokram ba kin pyni ia ki kam jong ki sha ki nongpynmih prokram.
Yn pynlong ia ka CMOT Talent Camp ban plié lad ia ka jingithuh ia ki nongmihkhmat na ki kompani bapher bapher jong ka India kiba iadei bad ki kam Media bad Kam Pynbyrnia kiba kynthup ia ki production house, ki kompani AVGC ki studio bad kiwei kiwei. Ha ka prokram thep kam, ki nongiashim bynta kin pyni ia ki kam jong ki ha kaba ki lah ban ioh kam bad ki briew kiba la pynskhem bha ialade ha ka kam pynmih prokram. Ki don 75 ngut ki nongbishar.
Ka “75 Creative Minds of Tomorrow” ka dei ka sienjam ba la saindur da u Myntri ka tnat Information and Broadcasting, u Anurag Thakur ban lap, ialam lynti bad plié lad ia ki samla ba don sap ha ki kam pynmih prokram na kylleng ka India.
Kum shi bynta kane ka sienjam, ki nongiashimbynta kin ioh ia ka rynsan ban pyni ia la ki sap sha kiwei kiwei ki ri. La sdang ia kane ka sienjam ban rakhe ia ka Azadi Ka AmritMahotsav ha ka IFFI kaba la long ha u snem 2021.
