Mairang, Nailur 27: Kum shibynta ban bteng ia ka jingpynshai paidbah halor ka khlam COVID-19 bad halor ka tika iada na kane ka khlam, ka ophis jong u Block Development Officer ka Mairang C&RD Block ka la pynlong ia ka prokram pynshai paidbah ha phyllaw jong ka Laitdom Presbyterian Secondary School , Laitdom Mawlieh.
Ha kane ka jingpynshai paidbah ia kane ka khlam COVID-19 bad ka jingdon kam ban ai Tika u Lamphang ka iing dorbar thawain jong ka Meghalaya Legistlative Assembly u la wan kum u Kongsan ha ka jingdon ryngkat u BDO ka Mairang C&RD Block u Bah V. Swer, ki nongtrei jong ki tnat sorkar bapher bapher, ki Sordar shnong ka thain, ki nongialam niam bad kiwei pat kila ia don lang.
Ka kane ka prokram la ioh ruh ka jingpynshai paidbah na ka liang jong u BDO ka Mairang C&RD Block bad kiwei de ki ophisar halor ki skhim pynroi bapher bapher jong ka sorkar kmie kumka PMAY, NRLM, MNREGS, DDU-GKY bad kumta terter.
Ha ka jingkren jong u kum u kongsan, u Lamphang ka iing Dorbar thawain ka jylla u ba long ruh u MLA kathain, Bah Metbah Lyngdoh u la ong ba ki skhim pynroi bapher bapher jong ka Sorkar Kmie kiba kynthup iaka MNREGS ki la iarap shi katdei eh ban kyntiew ia ka ioh ka kot jong ki paidbah nongshong shnong ka Ri khamtam kito kiba sah ha ki thain nongkyndong.
La kynturuh ia ki paidbah bad ki nongialam shnong ba kin bud ryntih ia baroh ki jingbthah kiba thymmai halor ka rukom pyntreikam ia kine ki skhim namar ka jingthmu hi ka long ban kham pynjanai shuh shuh ia ka rukom pyntrei kam ia ki na ka bynta ka jingbit jingbiang bad jingmyntoi u paidbah.
Haba kren halor ka jinglong jingman ha kari bad ka jylla naka daw jong ka khlam COVID-19, u Bah Metbah u la pynkynmaw ia ka jingiatreilang shitrhem da baroh ki nongshong shnong jong ka jylla ha ka kylla kaba nyngkong jong kane ka khlam ha u snem bala leitnoh bad u la kyntu ruh ia ki paidbah ba kin iai bteng ban husiar da kaba bud pyrkhing ia baroh ki jingbthah jong ka sorkar.
Ha kaba iadei bad ki lad jingiada na ka jingsaphriang jong kane kakhlam ha kane ka wat kaba mynta bad ban iai bteng ban ai jingkyrshan ia ki nongtrei jong ki tnat sorkar bapher bapher ha ka jingpyrshang jong ki ban iada na ka jingsaphriang shuh shuh jong kane ka khlam ha kari bad ka jylla.
U Bah Metbah u la kyntu ruh ia ki paidbah nongshong shnong ba kin ym sngap ia ki khubor lamler bad kikhubor bymdei namar kine ki don iaka bor ban ialam bakla ia ki paidbah bad kiba lah ruh ban long ki mawjynthut pynban ia ka jingiakhun pyrshah ia ka khlam COVID-19 da kibor sorkar bad bor shnong bor thaw.
La pyniphuh iphieng ia kane ka prokram da ka Skit halor ka phang “Iada ia la ki khun na u khniang COVID-19 ” ia kaba la pyni da ki nongtrei ka koit ka khiah jong ka PHC Laitdom bad ki nongshong shnong ka thain bad ia kiba la btinlynti da ka Dr Anita kaba la wan na ka liang jong ka World Health Organization (WHO).
Kiwei kiwei pat kiba la kren ha kane ka prokram ki kynthup ia u BDO ka Mairang C&RD Block u Bah V. Swer, u Bah Andrew Sawian uba la mih khmat iaka Indian Red Cross Society, u District Programme Manager, DDU-GKY, Nongstoin.
U Bah B. Marbaniang, u Medical Officer ka PHC, Laitdom u Dr. N. L Mawnai bad u Sordar Shnong ka Shnong Laitdom Mawlieh u Bah H. Lawriniang. Hadien ba la wai kaprokram la sakhi ruh ia ka jingai tika iada COVID-19 ha katei ka jaka ha kaba la pynlong iaka prokram.
