Jowai, Naitung 12: Ka Khasi Students’ Union ha ka sngi Saitjain ka la ioh ban pynskhem iaki ar tylli ki tnat treikam kiba hap hapoh ka jylli treikam jong ka KSU Jowai Circle.Kane ka jingpyniar jong ka KSU ia ki shnat treikam ha kylleng ka Bri U Hynniewtrep ka long kum shi bynta ban pynkhlaiñ iaka jingtreikam ka Seng.
Ia ki nongkit kam ka seng ha kine ki ar tylli ki jaka la leit ban pynskhem da u president ka seng KSU seng kmie u samla Lambokstarwel Marngar President ka KSU Seng kmie ryngkat ba dkiwei ki nongialam ka seng na kiwei kiawei ki Unit ruh kum juh.
Ki ar tylli ki shnat ba thymmai jong ka KSU kiba la pynskhem ha ka sngi Saitjain ki long, kawei ha ka shnong Madur bad kawei pat ha ka shnong Nongbah ia kaba baroh ar tylli ki unit la pynskhem da u President ka seng kmie u samla Lambokstarwell Marngar.
Ha ka jingpynskhem ia kine ki ar tylli ki shnat jong ka KSU ha Jiantia Hills u samla Lambokstarwell u la ong ba ba ka jingpynkha iakane ka shnat treikam jong ka Seng kam mut ba ki dkhot jong ka seng kin sa long ki diengpynkiang iaka shnong ka thaw lane ba kin sa long kita ki mawjynthud iaka Dorbar Shnong, hynrei kum ki dkhot ka Seng ki dei hi ban iabah ia tynrong lem iaka khia ka shon ka imlang sahlang bad ban iarap iaka roi ka par ka shnong ka thaw ha baroh ki liang.
Kum u President ka seng kmie u la kyntu ia ki dkhot jong kane ka shnat treikam ki dei ban long barabor kiba sngewrit ha jinglong jingman jong ki ha man la ki khep khnang ba kin long ki briew ba tip briew tip Blei bad kin lah ban pyntyllun iaka shalyntem jong ki kam ha ka lynti ba beit.
Kum ki dkhot ki dei ban skhem ka nongrim bara bor namar wei ba la khih phaloh ka jingmut jingpyrkhat kata ka lah long lupa ka jingtlot bad u la ong shuh shuh ba wei ba la don ha ka KSU ka lynti jong ka jingiaid kam dei satia ba jyllih hynrei ka dei kaba khohruh khohram.
Haba wer iaki samla ban iasoh bad ka Seng, utei u samla ula ong ba ki dkhot ka KSU kam mut tang iaki samla pule hynrei ia baroh ki samla ne ki dkhot jong ka jaidbynriew kiba dang kren hi iaka ishu jong ka jaidbynriew bad kiba don ka jingkitkhlieh marwei marwei bad lyngba ka KSU ba kin long ka tyndong sha u paidbah ba bun.
U la bynrap shuh shuh ba wei ba ki dkhot ka seng ki iaid haka lynti jong ka Hok bad ka jingshisha U Blei na jrong u long u nongaibuit ai bor ba khraw tam bad ba kin shaniah tang ha u hi khnang ba ki dkhot kin lah ban khih ban ksar ha ki ba bun ki liang bad ba kin don ka sainpyrkhat kum ki dkhot ba kin suh iaki theid jong ka jingtreikam jong ki shapoh bad ki tnad ki pyiar shuh shuh shajrong.
Ula kyntu ruh iaki dkhot ba haba ka Ri bad ka Jaidbynriew ka donkam , ki dkhot kidei ban long kiba la khreh khlem da tyngkai iaka buit ka bor bad ba kin buh sharud ka jingtieng bad shakhmat iaka jingkitkhlieh na bynta ka Ri bad ka Jaidbynriew.
Haba ai jingkren hakatei ka jingialang, u samla Lambok ula pynsngew iaki nongrim jong ka Seng hakaba naduh ba la seng iaka ha u snem 1978 bad ha ki 42 tylli ki snem ba la iaid, ka Seng ka ieng ha ki lai tylli ki mawbyrsiew kata ka long ban pynneh pynsah iaka riti ka dustur ba la buh ba lah seng da u longshwa manshwa.
Ban kyntiew iaka Jaidbynriew ha kiba bun ki liang la ha ka ioh ka kot ka synshar ka khadar bad ka imlang ka sah lang, bad ruh kyrpang eh ban iada iala ka Jaidbynriew Khasi na ki jingshah hiarthma haki mynder shi sngi kiba lah ban wan knieh iaka kaei kaba la don ha ka Ri.
U la bynrap bad kren shuh shuh haba iadei bad ka pule ka dangle bad kaba long kawei ka mat ba ka KSU naduh ba la seng iaka, ka la khih la ksar iakane ka mat bad halor kane ka nongrim ba la seng ha u snem 1978 iaka ban peit kyrpang iaka pule puthi ha jylla bad kumno ban kyntiew iaka ha ka jylla, namar kumba iohi hakane ka juk ba mynta ba ka long kawei ka waitlam ban rat dieng khong iaki jingeh ha ka jaidbynriew.
Haba ai mynsiem iaki Samla ba dang iasoh thymmai, u Samla Lambok ula pyni nuksa iaka jingshlur u Khlawait Ka Ri, U Woh Kiang Nangbah bad kyntu ruh iaki dkhot ka Seng baroh ba kin bud iaki deinjat bad iaki jinglong jong u Woh Kiang Nangbah khnang ba kin don ka mynsiem ialeh kaba dap shynrang hakino kino ki khep.
Haba ai jingsneng iaki Dkhot, u samla Lambok ula kyntu ruh iaki dkhot ba kin long ki nuksa ba bha iaki Hep kiba rit , ba kin long barabor kiba sngewrit haka jinglongbriew khamtam kum ki dkhot ka KSU kumba ka ju hikai bad ba kin long khamtam kiba tieng ia U Blei bad kidei ban long kiba la pynkhreh hakano kano ka por ba ka Ri ka dawa.
La sakhi ruh iakane ka sngi da ki riewpaw khmat jong ka thaiñ, kynthup ia u Waheh Shnong jong ka Dorbar Shnong Nangbah, ki Seng Longkmie jong ka Shnong Nangbah bad ki Seng Samla Shnong jong ka Shnong Nangbah ki VDP ka Shnong bad kiwei kiwei de. Ha kajuh ka sngi la ioh ruh ban Sam iaki jingkup thiah sha ki longkmie na ki dong bapher bapher .
La pynsyaid pynrhem ruh iakane ka lympung da ki jingrwai naki dkhot ka KSU Nangbah Unit, bad ka jingshad naki khun samla ka shnong. La pynkut iaka jingialang da ka jingkren u President ka KSU Nangbah Unit bad ki kyntien ai khublei u General Secretary ka KSU Nangbah Unit bad la aiti ruh iaka riti treikam ka seng sha u President ka Unit.
