Shillong, Iaiong 23: Ka tnat Information and Broadcasting jong ka sorkar Pdeng ka la maham mynta ka sngi ia ki channel TV kiba pyni ia ki khubor ba kin kiar na ki jingkynnoh ki bym don nongrim bad ruh ka jingpyndonkam ia ki headline ki bym iahap.
Ha ka jingbthah kaba la pyllait mynta ka sngi, ka tnat ka la ong ba dei ban bat ia ki kyndon katkum ka Section 20 jong ka The Cable Television Networks (Regulation) Act, 1995 bad ka Programme Code ba la bataishai ha kane ka ain.
Ka tnat ka la lap ba ha kine ki por ba la dep, ki don katto katne ki Satellite TV channel kiba la pyni ia ki prokram bad ki jingjia ha ka rukom kaba ym thikna, kaba ialambakla, kaba pynshitrhem bad ha kaba la pyndonkam ia ki kyntien ki bym iahap, kiba la ktah ia ka jingsngew bad ka akor.
Kiba long kiba jakhlia kiba pynrem ia ki briew bad kiba pynshit ia ka jingiaumsnam hapdeng ki jaitbynriew bapher bapher. Kane ka jingbthah ka la kdew sha ka thma hapdeng ka Ukraine bad ka Russia bad ruh ka jingjia ha North-West Delhi ha kaba ki jingiatainia bad ki khubor ba pyni ha kine ki channel ki iaidlaitia ka Programme Code.
Ha kaba iadei bad ka thma hapdeng ka Ukraine bad Russia, ka tnat ka la lap ba ki TV channel ki ai ia ki headline ki bym iahap bad ki jingjia bad ba ki nongthoh khubor ki wanrah ia ki jingkynnoh ki bym don nongrim lane ka jingpyndonkam ia ki kyntien ha kata ka rukom ban pynshitrhem ia ki nongpeit.
Ha kaba iadei bad ka case ha Delhi, ki don katto katne ki channel kiba la pyni ia ki khubor kiba don ki headline kiba pynshit bad ki pyni ruh ia ki video jong ka jingumsnam kaba lah ban pynshit ia ki briew bad ktah ia ka shongsukshongsain. Ki channel ki la pyndonkam ruh ia ki headline kiba kynnoh ba ki bor pyniaid ki iashahshiliang haba ki tehlakam ia ka jingkulmar.
Ka tnat ka la maham ruh ia ki TV channel shimet ba kim dei ban pyni ia ki jingiatainia ha kaba la pyndonkam ia ki kyntien ki bym iahap ha ka imlang sahlang, ki kyntien kiba pynshit lane kiba pynrem kiba lah ban ktah ia ki nongpeit bad wanrah ia ka jingkulmar hapdeng ki jaitbynriew bad pynthut ia ka shongsukshongsain.
Da kaba kdew ia kine ki case ba la pynkhein ia ki kyndon, ka tnat mynta ka sngi ka ong ba ka dap da ka jingsngewkhia halor kine ki prokram ba la pyni bad ka la ong ba ym dei ban pynkhein ia ka The Cable Television Networks (Regulation) Act, 1995 bad ki kyndon kiba don hapoh kane ka ain. Ia kane ka jingbthah lah ban iohi ha ka website jong ka tnat I&B – www.mib.gov.in
