Shillong, Nailur 09: Ka All Khasi Meghalaya Tourist Taxi Association (AKMTTA) ka la sdang ia ka jingiakhih jong ka da ka ba teh lama iong” kaba la pynlong mynta ka sngi ka 9 tarik u Nailur kaban bteng haduh 14 tarik Nailur 2024.
Ka seng ka kyntu ia ki nongniah taxi ba kin teh lama iong kum ka dak ka jingpyrshah ia ka jingwan ki kali nabar Jylla ban kit ia ki nongshangkai pyrthei sha kylleng ki jaka jngohkai ba paw ka Jylla.
Ka AKMTTA kham hashuwa, ka la kynthoh jur ia u Myntri kam jngohkai bah Paul Lyngdoh ba um shym la leh eiei halor ka jingdawa jong ki ban khanglad ia ki kali bym dei na Jylla, hadien ba ki la iakynduh ia u ha u bnai Jylliew.
Halor kane ka jingleh jong kaAKMTTA, u Myntri kam jngohkai u bah Paul Lyngdoh u la kyrpad ia ki seng bapher bapher ban iawan lang hapoh kawei ka shatri ban wanrah ia ki jingdawa jong ki sha ka sorkar, ia kaba yn lah ban iakren. U la ong ruh ba ka long kaba kongsan ba ki seng bapher bapher kin wan hapoh kawei ka rynsan.
U bah Paul u la ong ruh ba kumba 60% na ki nongñiah kali kim dei na kano kano ka seng, bad kiba sah 40% ki phiah ha ki katto katne ki kynhun. Kumno phin lah ban iakren ia kat kine ki kynhun bapher bapher haba kam don kawei ka sur.
U la kdew ruh ia ka jingbym iahap ha ka iew ka hat, da kaba batai, Ka ain jong ka jingdawa bad jingpynbiang ka treikam. Mynta ka don ka jingduna kumba 3,000 tylli ki kali ban kit ia ki nongjngohkai pyrthei hapoh ka jylla Meghalaya.
U la ong ruh ba ka Sorkar kaa dep pynlong ia ar tylli ki jingïalang bad ki kynhun bapher bapher kiba trei ia ki kam ba ïadei bad ka kam jngohkai pyrthei, kynthup ïa ki nongkit mar, ki nongpynïaid hotel, ki trai jaka sah, ki seng jong ki nongñiah kali, bad ki nongialam lynti.
U bah Paul u la ongruh ba ka long kaba kongsan ia ki nongniah kali ka Jylla bad ki nongniah taksi ban kin iakren bad ki paralok jong ki ba na Assam. U la ong ha ka jingshisha ba ka jylla Meghalaya ka shaniah kham bun ha ki nongjngohkai pyrthei na Assam.
Ka kad liengsuin kaba kongsan, ka railway station, bad ki hospital kiba bha tam ha ka thaiñ ki don ha Guwahati. Ki riew shemphang jong ngi ki trei ha kylleng ka Assam.
Ka dei ka mat kaba khia bha, bad ki dei ban phikir bha haba leh ia kano kano ka kam, ban pynthikna ba kin ym buh ha ka jingma ïa la ka jong ka jingmyntoi ha ka jingïai dawa ia kiei kiei baroh.
