Shillong, Naitung 04: U Myntri Rangbah ka jylla mynta ka sngi u la iathuh ba ka sorkar kala wan rah ia ka jingpynkylla ha ka jingsiew ia ka khajna na ka kamai ia kaba la tip kum ka “Profession Tax” ia kaba la shim da ki Autonomous District ha ki jaka jong ki bad ha ki jaka jong ka sorkar la shim da ka tnad lum khajna.
U Myntri Rangbah la ong ba la wanrah ia ka kane ka jingpynkylla ia ka “Meghalaya Profession Trade Calling and Employment Tax, Act 1947” bad kam kum kane ka long ba baroh ki hap ban register ia baroh bad kane kan long ha ki jaka jong ki District Council kin shim ki District Council bad ha ki jaka jong ka sorkar kan shim ka sorkar lyngba ka tnad lum khajna.
U Myntri Rangbah la ong ba lada u ne ka kaba ka kamai jong ki ka long hapoh ka T.1.8 lak tyngka kim don kam ban siew ei ei, mynshuwa ka long ba kito kiba kamai hapoh ka T.50000/- tyngka ha ka shisnem kim don kam siew ei ei, hynrei mynta la pynkiew sha ka T.1.8/- lak tyngka. Mynshuwa ki don 12 tylli ki kyrdan kiba hap ban siew ia kane ka khajna bad mynta la pynhiar sha ka saw kyrdan.
Kiba kamai palat ia ka T.1.8 lak haduh T.3/- lak tyngka ha ka shisnem ki hap ban siew ia ka khajna kamai kin hap ban siew T.500/- tyngka, kiba kamai T.3/- lak haduh T.5.lak tyngka ki hap ban siew T.1000/- tyngka, kiba kamai T.5 lak sha ka T.7.5 lak tyngka ki hap ban siew T. 1500/- tyngka bad kiba kamai T.7.5 lak shaneng ka jingsiew kan long T.2500/- tyngka.
Ka kabinet kala wanrah ruh ia ka jingpynkylla ia katei ka ain, ka long ba mynshuwa lada kim siew ia ka khajna yn set patok lai snem, hynrei mynta la weng ia kane bad la wanrah ia ka kyndon kaba thymmai ban phah siew noh saw sien siew bad ka sut kaba 12 tyngka shispah shisnem. Kane kan treikam naduh ka 1st Iaiong 2022.
Kawei pat kaba ka kambinet kala pdiang ia kadei ka Ordinance ha kaba ia dei bad ka National Law University ia kaba yn sa hap ban pdiang da ka iing dorbar bad kane kan trei kam noh mar dor bad kan sdang ban pdiang ia k samla tang 60 ngut ha kaba sdang.
Ha kane ka sngi ka Kabinet kala pdiang ruh ia ka jingthung kam hapoh jong ka Rongjeng Model College, kumba la leh ia ka College ha Patharkhamah.
