S
hillong, Naitung 30: U Chief Executive Member jong ka KHADC u bah HS Shylla mynta ka sngi u la ialam ia ka kynhun jong ki MDC ban ia kynduh ia u Deputy Chief Minister u Bah Prestone Tynsong ban kyntu ia ka sorkar ba kan pynkloi ha kaba phah sha u Lat jong ka jylla ban ioh ia ka jingmynjur ha kaba ia dei bad kane ka Bill.
Haba jubab ia ki jingkylli ha kaba ia dei bad ka jong ba balei ym shym la khang ruh ia ki shynrang kiba ioh lok da kawei pat ka jaidbynriew, na ka liang jongu CEM u la ong ba kane ka jingioh briew jong u shynrang da kawei pat ka jaidbynriew, kane kam da dei eh ka jingma, hynrei lada don kam ban leh ia kata ruh kam don jingeh. Halor jong kane u la ong ba kila don kiba la ai jingmut ia kane ka bynta ruh, la ong ba la dei ban khang na ka bynta ki rangbah ruh yn nym don ba pyrshah ia kata.
Haba ia dei bad kane ka Bill kaba la pass da ka KHADC ka long ban iada ia ka jaidbynriew rit paid hapoh jong ka Riti synshar jong ka Ri India, ka sorkar pdeng kala ai ruh ia ka Land Tranfer Act, ka ain Trading byn Non Tribal, ka jingbhah kam kyrpang bad haba phai sha ka jylla ruh na ki 60 tylli ki Assembly Seat 55 la mang na ka bynta ki Tribal kane ka long ban iada ia ki, kane ka bill kaba la wan rah da ka District Council ruh ka long ba iada ia ki rit paid hapoh ka Riti synshar jong ka Ri India.
U CEM jong ka KHADC u la kren shai ba kane ka ain kam shym khang iano iano ruh ba kin shongkha ia u ne ka briew kaba ki don ka jingiaieit, hynrei kane ka ain ka long ba lada ki ioh da kiwei pat ki jaid bynriew ka long ba ki duh noh ia ka jinglong Rit paid jong ki. Kito kiba kynnoh ba kane ka bill kan long kaba shongnia, u Bah Shylla u la ong ba kiba pyrshah ia kane dei tang kito kiba ioh briew da ki bym dei khasi.
U CEM u la kren shai ba kito kiba la dep ban iathoh naduh mynshuwa kan nym ktah ia ki, hynrei kane ka bill kan khang ia kito kiba ioh briew da kiwei ki jaidbynriew nane sha khmat. Kito kiba ioh briew da kiwei ki jaidbynriew kim dei ban kren stad ia kane ka bill kim don hok ba kren bad kine ki dei ki nongshong jong ka jaidbyriew.
Kane ka jylla Meghalaya ka don lai tylli ki District Council, ka GHADC, ka JHADC bad ka KHADC, ia kane ka juhka bill ka GHADC kala dep ban pass ia kane ka juh ka bill, mynta ka KHADC ruh kala pass ia kane ka Bill bad mynta ka JHADC ruh kan sa leh noh shen. Na ka liang jong u Bah Shylla u don ka jingkyrmen ba ka sorkar kan sa ai noh ia ka jingmynjur jong ka ha kaba ia dei bad kane ka Bill ban iada ia ka jaidbynriew.
