Shillong, Jymmang 12: Katkum ka jingpynbna jong ka tnad ka koit ka khiah jong ka sorkar jylla bad ki kaiphot na ki stad ba dei na ka tnad ka koit ka khiah la ong ba ka jingdon jong kiba pang COVID-19 positive ki lah ban long palat ia ka 25 shah na kiba la ioh jingkhien.
Kane ka lah ban long namar ba bun na ki don ia kane ka jingpang kim pyni ia kano kano ka dak ka shin, lane ki briew kim wan sha khmat ban phah test ia lade namar ba ki tieng ia ka jingshah peitkhmat ha ka imlang sah lang bad kum juh na kiba ha iing ha sem.
Ha ka jingpynbna ba la pynmih da ka Deputy Commissioner jong ka East Khasi Hills District, la ong ba naduh ka 1/5/2021 kala don ka jingkiew kynsan kiba ioh ia kane ka jingpang COVID-19 ha East Khasi Hills District bad kum juh kiba la khlad.
Ha kine ki khatwei sngi la test COVID-19 positive 2098 ngut, kiba khlad 59 ngut bad haba shim ia ka jingkhein kyllun ka jingshitom jong ki briew ka long 191 ngut bad ka jingiap ka long 5 ngut ha ka shi sngi, kumba ka long mynta ki hospital ki ia kynduh eh ban pynbiang ia ki jingthiah bad kum juh ia ki ICU.
Kumba ka long mynta kiba bun na kiba khlad ki dei kiba la don ia kiwei kiwei ki jingshitom bad ka rta jong ki ba khlad ka long ha pdeng 20 bad 50 snem, wat hapdeng ba don kane ka jingkhang dam la shem ba don bun bah ki briew kiba ioh ia kane ka jingpang.
Ka jingiabit kane ka jingpang na ki jaka paidbah kala hiar, hynrei ka jingiabit na kina ha iing ha sem bad kiba don ka jingiajan kala dang kiew bad kane kala jia mynta bad kan dang lah ban dang kham kiew ha kine ki sngi ban wan.
Na ka liang jong ka sorkar kala shim ia ki lat ki lynti baroh ban iada na ka jingsaphriang kane ka jingpang ban lait na ki jingeh kumba long lem ha kiwei ki jylla, ka sorkar kala pynsngewthuh sha ki paidba ba kin niew ia lade kum kita ki nongrah ia kane ka jingpang khlem da pyni ia ki dak ki shin.
Ban iada na kane ka jingpang baroh ki dei ban but ryntih ia ka jingdeng ia ki mask wat ha iing ha sem ha kine ki 14 sngi kiba don wan, dei ban shong khop ha ki iing wat ia leit ia rung ia mih sha ki iing ki sem wat jong ki para marjan. Haba ki dukan ki plie kiba die ia ki marbam la shah tang wei shi iing ba mih.
Na ki jingkhein ba la ioh palat ia ka 50 % kiba la test COVID-19 positive ha kine ki sngi dei kiba don ka jingiajan bad kiba shitom bad kiba bun na kine ki dei na kiba ha iing ha sem, kiba ia treilang, ki para marjan bad na ki briew kiba ia ithuh ithaw bad kito kiba mih bad leit sha ki jaka paidbah ki hap ban bud pyrkhign ia ki kyndon baroh ryngkat ka jingleh khuid bad jngai na kiba ha iing ha snem.
Lada ka long kaba lah ban buh ia ka kamra kaba kyrpang na ka bynta kiba don ia ka dak ka shim ba ki shitom bad kum juh ia ki briew kiba mih ba leit ba wan, kino kino kiba don ia ka jingjyrhoh, shit khriat bad kiwei kiwei ki dei ban kiar na ka jingiakhleh lang bad kiwei bad kidei ban pyntip sha u number 14410 bad leit sha ki jaka ai jingsumar ba jan eh.
Namar ka sorkar kala shah ban sumar ha iing ia kiba shitom malu mala, kumta la kyntu ia kiba la noh ka rta ba kin shong kho ha ki iing ki snem, ki nongtrei ka tnad ka koit ka khiah kin shim ia ka kyrteng jong ki, ki CCMTs ki lah ban iarap da kaba phah ia ki kyrteng jong ki riew tynmen sha ki jaka sumar kaba ki hap.
Kito kiba don ka jingiajan bad kiba shitm katba dang ap ia ka kaiphot lada don kano kano ka dak ka shim ki dei ban pyntip sha u number 14410 bad kumba ka long mynta ka dawai kaba lah ban pyniap ia une u khniang jingpang ka long ban pynia jngai iwei na kiwei, sait ia ki kti deng ia ki mask ha ki jaka paidbah bad ban iada na ka jingpoi sha ki Hospital don kam ban ai Tika.
