Shillong, Lber 12: U Monu M Areng na ka shnong hapoh ka shnong Nagrabil mynta ka sngi u la ong ba ha dien ka jingshah pyniap u khun jong u ha ki riew sniew u la dep ban ai ia ka ejahar hapoh Pillangkatta bad kum juh sha u Superintedent jong ki pulit k
a Ri Bhoi District ha ka 10.01.2020.
Haba kren ha ki lat pathai khubor u Monu M Areng u la ong ba ki pulit kim shym la leh ei ei wat la ki la ai ia ka kyrteng jong ki briew ha ka ejahar. Kaba ki pulit kila kem ka long tang ia u Darius Marak u ba la wan bret ia ka met iap u khun jong u ha ka 16/12/2019.
U Monu u la ong ba ka ki dap da ka jingsngewsih ba kito ki briew kiba la jer kyrteng ha ka ejahar haduh mynta ki dang byrngem ia ki, hynrei na ka liang ki pulit ka Ri Bhoi District ki khlem leh ei ei haduh mynta pyrshah ia kito ki briew, ki briew kiba la jer kyrteng ha ka ejahar ki byrngem ia u haduh mynta.
U Monu u la ong ba lada ka long kumne kam don shuh kata ka jingshaniah ha ki pulit, u la ong ba u dawa na ka sorkar ba kan ai jingiada ia ka iing ka sem jong u namar ka jingshah byrngem bad na ka daw jong ka jingbym leh ei ei ki pulit wat la kila dep ban ai ia ka ejahar mynta la ar bnai.
La iathuh ba ka daw jong ka jingshah byrngem ka dei na ka jingpynsaphriang jong u Markus Lapassam na ka shnong Umtyrnga ba hana ka pisa T.78 klur kala poi ha ka account jong u, dei halor kane ba u Darius Marak bad u Nathil K Momin kila rah bor ia u khun jong u ba dang 16 snem ha ka bad shim noh ia ka jingim jong u da kaba dawa pisa shiklur tyngka, ia u tei u nongpynsaphriang ia khubor dei ban kem, la dawa u Monu.
La iathuh ba ka jingrah bor ia u khun jong u ka long ha ka 4/12/2019, ha ka 7/12/2019 kila dawa pisa shiklur bad ha ka 16/12/2019 la wan bret ia ka met iap u khun jong u, ki pulit kila kem ia u Darius Marak katba ia u Nathil K Momin kim shym la kem haduh kine ki sngi bad une u briew u la dang wan ban byrngem ia ki ban dawa biang ia kata ka pisa shiklur.
Haba ia dei bad katei ka pisa T.78 klur, ka long ba ki 40 tylli ki long iing na ki lai tylli ki shnong Nagrabil, pillangkatta A bad ka Pillangkatta B, kila aiti ha u ban tyrwa die lem ia ka jaka jong ki bad haba shim kyllum baroh kala kot sha ka 7000 akar, hynrei namar ba ki BSF kim pat shim ia kane ka jaka ka pisa ruh kim pat siew.
Dei halor kane ba u la shah dawa pisa shiklur ha kitei ki riew riewsniew, ha ka ejahar la thoh shai kdar ia ka kyrteng jong ki briew, u Robinson M Areng secretary bad u Bisnath K Sangma rangbah shnong ka Nagrabil, ha ka ejahar la kdew ba ia u briew ba la kynnoh ba u don kti ban pyniap ia u khun jong u u Darius Marak la kem, hynrei u Nathil K Momin bad u Harkinson marak kila phet noh na katei ka shnong sha Jalkhom ha North Garo Hills ia kaba ki pulit kim pat kem haduh mynta.
Ha ka ejahar la jer kyrteng ruh nalor jong ki tei kiba la kdew haneng sa 23 ngut kiwei ruh kiba la ia don kti ha katei ka kam pyniap briew. Namar ka jingbeteng ka jingshah byrgnem u kyntu ia ki bor sorkar ba dei ban ai ka jingiada ia ka iing ka sem jong ki namar ki pulit jong ka Ri Bhoi District kim shym la leh ei ei halor kane ka jingujor jong u mynta la ar bnai.
