Shillong, Nohprah 03: KA Meri Shangpung President ka All Jaintia Muster Roll Workers Labour Union (AJMRWLU) kala iathuh ba ha Jaintia Hills kiba trei Muster Roll kim ioh khaw rashon da kaba ai daw ba ki dei ki nongtrei sorkar.
Haba kren ha ki nongthoh khubor mynta ka sngi ha Shillong Press Club, ka long ba kila pyrshang ban wat jingtip na ki dukan bas am rashon ka jubab kaba ki ioh ka long ba la niew ia ki kum ki nongtrei sorkar kumta kin nym ioh khaw rashon.
Halor kane ka jingbym ioh khaw rashon ki nongtrei Muster Roll kiba dei tang ki nong bylla sngi u bah Khroo Pariat u nongai buid u la ong ba kane ka jingbym ioh khaw rashon jong kiba trei Muster Roll ka dei kaba la slem bha sha Jaintia Hill baroh kawei.
U bah Pariat u la kren shai ba ki Muster Roll kim dei ki nongtrei sorkar ki dei tang kiba bylla sngi bad ka sorkar namar lada ki pep trei ki shah khate ia ka bai bylla sngi, la iathuh ba kila ia kren bad ki bor jong ki District hynrei kim ioh ia u khaw rashon.
Katkum ka jingpynbna jong ka sorkar ka long ba tang kito kiba dei ki nongtrei sorkar kim dei ban ioh ia u khaw rashon bad lada don kiba ioh ruh ki dei ban pynphai noh ia ki kard rashon sha ka sorkar, kaba sngew lyngngoh ba ki Muster Roll kiba dei tang ki nongbylla kim ioh khaw rashon.
