Shillong, Naiwieng 29: Ka Khasi Students’ Union myn ha ka 28 tarik u Naiwieng 2023 hapoh ka jingialam jong u Samla Eric Nongkynrih, Sport Secretary ka Seng ka lah ioh ban ai jingiarap ia ki Samla ki ban mih khmat sha ka National Youth Champoin League kaban long ha ki tarik 8-10 jong u Nohphrah 2023 ba lah pynlong daka Pro MMA League hapoh Priyadarshini Youth Complex, Malund West, hapoh ka nongbah Mumbai.
Ka Seng ha kane ka sngi ka lah ioh ban noh synñiang lang sha ki 4 ngut ki samla ki ba mih khmat lyngba ka Shlem School of Martial Arts kaba don hapoh Mawlai Iewrynghep.
U Samla Eric ha ba ai jingkren u la kyntu kynpham bad a kitei ki samla ki ban mihkhmat ba kin trei shitom ban ioh ia u soh ka jingjop ha ka jingiakhun ka jongki bad kumjuh ban iai kyntiew lem iaki para samla namar ka jingialehkai sports ka dei ka wei ka lad ka lynti ka ban pynjngai iaki samla na ki jingdih pynbuaid kiba kyrni kum u drok u ba lah kynrei bha hapoh ka jylla jongngi.
Kumjuh u la pynkynmaw ruh iaki sienjam ki ba ka Seng ka lah shim hakaba ka lah plie iaka Maitshaphrang MMA and Fitness Team hapoh ka shnong Nongthymmai kum kawei naki shlem ban ai jinghikai iaki Samla ha ka liang kilan met bad kumjuh ban ban kyntiew iaki Samla haka kam ialehkai.
Ka All Meghalaya Khasi Tourist Association ha ka 29 Tarik u Naiwieng, 2023, ka la leit ban ïakynduh ïa u Myntri ba dei peit ka tnat jngohkai pyrthei u bah Paul Lyngdoh halor ka mat ban pynsahngeh ïa ki kali Tourist kiba wan na Assam ba kin ïaid laitluid ha kylleng ki jaka jongohkai pyrthei jong ka jylla.
Haba kren sha ki lad pathai khubor, u President ka AKMT Bah Ricaldinus Dohling ula ong ba ki kali na bar Jylla kum na Assam ki wan poi da ki phew tylli shaki jaka jngohkai ka Ri-lum Khasi Jaintia, kane ka la pynduhnong shi katdei ia ki nongniah kali trai jylla kiba kamai da ka ba ialam ia ki briew nabar Jylla sha ki jaka jngohkai.
U Bah Ricaldinus Dohling u la iathuh ba ka AKMT ka kyntu ia u Myntri ka tnat shang pyrthei ban thaw lad, thaw lynti ha ka ban pynbiang ki jaka ïeng ki kali kamai tourist kiba wan nabar Jylla khnang ban ailad ia ki kali napoh ka Jylla ban ialam ia ki nongwan shangkai pyrthei ha ki jaka jngohkai jong ka Meghalaya, kum sha Sohra, Dawki bad kiwei kiwei ki jaka.
Shuh shuh u la ong ka jingdawa jong ki ban don noh da ka jaka ban pynïeng ia ki kali kamai bar Jylla, kum ha ISBT Mawiong bad sha kiwei ki jaka, kam mut ba ki khang ia ki ban wan sha Meghalaya hynrei kane ka dei ban ailad ia ki nongniah trai Jylla ban im ka kamai da ka ba kit bad ialam kai ia ki nongwan shangkai pyrthei ha ki jaka jngohkai ba don hapoh ka Jylla.
U Bah Ricaldinus u la kam ba da ki phew tylli ki Bos na Assam jan man ka sngi Saitjain ki poi sha ki thain Sohra bad Dawki, kane nalor ba ka pynduhnong ia ki dribar trai Jylla, ka pynkhapniah ruh ia ka surok khamtam ha nongbah Shillong. Kumjuh ruh u la iathuh ka seng ka kyntu ruh ia u Myntri ban tuklar lem halor ka jingshah pyndik ki nongniah kali trai Jylla ha ki Pulit ka Shillong Traffic Police ki ba pynïeng ia ki kali kamai ha Khyndai Lad.
Haba kylli, u nongialam ka AKMT ula iathuh ba shen ka tnat kam jngohkai pyrthei kan sa khot jingialang ia ka Company Adani ka ba khmih ia ki nongwan shangkai pyrthei ki ba thmu wan sha Meghalaya lyngba ka Kad Lengsuin Guwahati.
