Shillong, Risaw 19: Ka long ïing jong ka Meirad Thaneh Warjri ki la poi shong shnong sha Kyrdemkulai la bun snem mynshwa, hynrei ka lanot ka lawan lynshop ha ka ba ka kmie ka la kem byrïe lah palat phew snem haduh banda matlah syndon.
Nalor kata, Dang kumba katto katne bnai mynta lah khlad marbud u pyrsa kurim bad ka khun khatduh ka ba dei ban sumar ïa la ka kmie ka ba lah matlah jynduh. Kiwei kiwei ki khun ruh ki lah ïa poikha bad shong shnong sha ba kham pajih bad ki shem shitom ban kit ïa la ka kmie namar ba ïalade ruh ki long ki ba duk ba kyrduh bad hap beh bylla kylleng kylleng.
Kumta ka jingkitkhlieh ka la ban khia ka mei ieid ha ka khun khatduh ba dang shu khlad shen, ka la iehnoh khunswet ïa lai ngut ki khun, ka Aidalin Warjri bad la ki ar ngut ki para shyrang ba dang rit. Kumta ka Aidalin ba dang khathynñiew snem ka ryta ka la hap ban shimti ïa ka lyngkor ban bsa la ka kmierad ba matlah bad ki arngut ki para shynrang da ka ba trei bylla ha marjan shnong.
Ka lanot jong kane ka long ïing ka long ka ba la palat liam namar ba ka ïing ka ba kishong ki sah ruh ka ba lah tor bad kim don lad ban maramot, nalor ba ki shu ïoh jaka riehtngen ha ka khyndew jong ka Meghalaya Electricity Corporation Limited.
Kane ka khubor shemlanot ka la poi sha ka jingtip jong ki rangbah kur Warjri ha nongbah Shillong. Kumta mar mar ki la hiar sha shnong Kyrdemkulai ban leit khmih bad jurip ïa ka long ïing jong ka meirad Thaneh Warjri bad ha ba ki la shem ïa ka jingshisha, la pynkhreh mar mar ki lad jingïarap.
Ha ka sien ba nyngkong lyngba ka kyrpad kyrpon jong u Saiñpynïar ka Seng Kur Warjri, Bah Sunshine Warjri la noh jingïarap da ki marbam mardih kat ban dap bam bnai bad shisong ki jaiñphong ryngkat bad ka pisa ba la synñiang da katto katne ki rangbah kur bad ka India Every Home Crusade.
Hadien kata ka Seng Kur Warjri ka la mang tyngka ban noh synñiang na ka bynta ban shna bha ïa ka ïing ka ba lah jot. Ha ka sngi nyngkong 19tarik Risaw, 2020 saw ngut ki rangbah kur ba kynthup ïa u Khliehduh President Bah D L Warjri, Saiñpynïar , Sunshine Warjri ha ryngkat ki dkhot rangbah.
U Bah Rudy Warjri bad Bah Raphael Warjri ki la leit ban sakhi ïa ki kam ba lah bynshet na ka bynta ban khmih ïa ka ka bha ka miat jong ka longïing ha ryngkat u synñiang, ka kyntu kynpham bad kyrkhu kyrdoh ba kin ïa bit ïa biang.
Na ka liang ki khlieh nongkitkam jong ka Seng Kur Warjri ki la pynpaw ba wat la ki la ïohlad ban shimkhia bad pyndep la ka kamram ïa la ki parakur parajait, phewse ka khlam Covid 19 ka la ktah jur ïa ym tang ïa kane ka longïing, hynrei ïa ka imlang sahlang baroh kawei.
Na kata ka daw ka Dorbar Kur ba shisien shisnem ka ba la thmu ban pynlong ha Sohryngkham ruh la rai ban sangeh noh shwa ha kane ka snem ba jur than ka hiran bad ba pyrkhing ki adong ha satlak ka jylla.
Ka Seng Kur Warjri ka la kyntu ïa ki shnat ha kylleng ka Ri Khasi Jaintia ban long ki ba peitngor ïa ka imlang sahlang khamtam eh ïa la ki parakur parajait ba kin lait na kano kano ka shitom ka jynjar. Kumjuh ruh la pynpaw ba ha kawei ka liang pat don ki parakur ki ba la wanrah burom ba dei ban pyrto ïa ki kam ki ba la rasong ha ka imlang sahlang.
Ka long ka ba sngewphieng ban tip ba ha Ri Argentina, ha ka ba ka sorkar jylla ka la ainam ïa ka shilynter ka surok ha ka kyrteng jong u Sohblei Patrick Warjri na ka daw ki kam babha ha ka imlang sahlang.
Ha ka jingïakren bad u Bah Rudy Warjri la sngewthuh ba ki kam radbah jong u Sohblei Patrick Warjri ka dei namar ba u la jop ban rat dyngkhong ïa ki kam sniew kam smeh na ka ba kyrni dih aphin bad ki kam awria ha shnong ha thaw.
