Shillong, Naiwieng 19: Ki mat ki jura ka Jaidbynriew ki mih beit man ka sngi, tangba ka eh ban ia syllok bad ka sorkar namar ki heh sorkar ki bunkam shabar khamtam sha nongbah Delhi.
Ka Delhi ka dei ka shnong pdeng ka sorkar India, kaba hangne ki rai ia ki mat la yn pynbha ne yn pynsniew ia kano kano ka bynta ka India bad wat ban rai la yn shu sngap beit, ieh beit, dep shato beit ia kino kino ki jingjia ha India.
Ki iarmangkalai la jied ban mih khmat ia ki paidbah, ka dei ka kamram ka jong ki ban ia said ia ka iap ka im u paidbah ha la ka jong ka jong ka jylla ha khmat ka sorkar pdeng.
La khatsaw sngi lynter la shah thngan ki samla pule ka NEHU ban wan rah ia ki jingkylla ka NEHU, ki jingkylla ban ai jingmyntoi bad jingshakri ba pura ia ki samla pule bad nongwad kam ha jylla, hynrei na ka liang ki iarmangkalai ki sngap jar jar lane ki shu kut tang ha ka ktien khlem iohi kam shano shano ruh.
Napdeng ki 19 ngut ba shah thngan jan baroh ki la poi hospital lut, ka met kine ki samla ba dang lung ka rta ka la khrew, ka jingpule ka jong ki la ktah, ki kmie ki kpa bad ki bahaiing jong ki, ki jaw ummat man ka sngi, tangba phewse ba ka jingiakhih ka jia por tlang, ka por tamasa, ki iarmangkalai kim lah ban leit Delhi ban dawa ia ka hok u paidbah namar hap ia don bynta ha ki kam tamasa kiba laiphew jait.
Kat haduh mynta ym pat don uwei u iarmangkalai ban leit sha Delhi ban dawa ia ka hok ki samla pule ka NEHU. Ïoh lehse ka NEHU kam dei ka jaka ban phah pule ia ki khun ki heh ki haiñ, kumta ym don jingpyrwa tang khyndiat ruh.
Ka jingshah jingit ki samla pule ka NEHU ba la lam khmat da ka NEHUSU bad ka KSU NEHU Unit kam dei na ka bynta ka myntoi shi met, hynrei ka dei na ka bynta ka myntoi ruh ia baroh lang kaba kynthup ia ki nongtrei hangto, ki samla ba pule ha ki kolej ba pyniaid ka NEHU bad khamtam ruh ia ki pateng ki ban wan la ka dei ha ka kam ka jam ne ka admission pule.
Ki kam ki jam la bat lut ki nongwei kiba ym don ka sap ban pyniaid ia ka NEHU, ki don ki kam kiba haduh mynta khlem pyndap namar ba bishni ban ioh ki trai jylla, ki jingdonkam ha ki departments ba pher bapher ki duna haduh katta katta bad u VC lem bad ka kynhun jong u kim sngap ia ka jingud jingnam ki samla pule, ki nonghikai bad nongtrei mynta la bun bun snem.
Ka KSU ka la peit sani bha mynta la 14 sngi ia ka jinglong jingman ha NEHU. Ka la iohi ia ka jingtyrha ki samla pule khamtam kito ki ba shah thngan, ki la shu im ha ka drip, ki injections, electrolytes, glucose bad ORS. Kine ki samla pule ki dang khynnah. Ki shu poi hospital khah khah na ka jingshah jingit.
Chief Medical Officer ka NEHU mynne i la pynpaw ia ki jingma ki ba ap ia kine ki samla ba shah thngan kiba lah ban ktah wat hadien. U Kevin Nelson Wanrap, GS KSU NEHU Unit u la poi hospital biang ha ka sien kaba ar abd mynta ka kynti ki doctor ha Civil Hospital ki la ai syndon da ka oxygen ba um lah ring mynsiem shuh.
U Sandy Sohtun, President NEHUSU u la ioh pang ha ka nierbah namar kane ka jingshah thngan hynrei u iai bteng beit ia ka jingiakhih. Sa katno pat ngin shu sngap? Ngin ap haduh da iap briew ne ko sorkar.
Mynta ka KSU ka buh jingkylli ia ki politicians, ki ministers, ki MPs, hato phin shu ia thoh shithi? Hato phin shu ia phone? Hato phin shu wan sngewlem? Hato phin shu ia sngap jar? Kan eh aiu ba phin leit tur baroh 59 ngut sha Delhi? Haba phi ia smat leit Delhi khah khah ha baroh ki aïom. Lane ioh lehse ka kam ha NEHU kam phoida eiei ia phi baroh 59 ngut namar ki bahaiing jong phi ki pule lut shabar?
Ka KSU kan ym lah ban shu sngap, hynrei lada ki nongmihkhmat kim lah ban pynbor ia ka sorkar pdeng khamtam ia ka Ministry of Education ban pynbeit ia ki kynrum kynram ha NEHU da kaba weng noh ia u Prabha Shankar Shukla, ka seng kam banse ban hap shim noh da kiwei ki sienjam ban pynsngewthuh janai ia ki shkor ba kyllut ka sorkar jylla bad sorkar pdeng, kane ka long ka kyrwoh kaba la phah da u samla Donald V Thabah General Secretary ka KSU.
