Shillong, Rymphang 16: Katkum ka riti synshar jong ka Ri India Article 176 u Lat ka jylla mynta ka sngi u la ai ka jingkren jong u ha ka sngi sdang jong ka dorbar mang tyngka ka iing dorbar thawain ka jylla kaba dei na ka bynta jong u snem 2024-2025. Ha kane ka sngi u Lat ka jylla u Phagu Chauhan u la kren ia ka ktien khasi hapoh ka iing dorbar.
Ha ka jingkren jong u lat k jylla hapoh ka iing dorkar mynta ka sngi u la ktah lut ia baroh ki tnad sorkar bapher bapher bad ia kaei kaba ka sorkar kala leh bad ia kaei kaba ka sorkar kan sa dang leh na ka bynta ban kyntiew ia ka jylla ha ka ioh ka kot ban pynkot sha ka 10 Billion US Dolar ha u snem 2028.
U Lat ka jylla u la kren shai ban kiew ka roi ka par ka long kaba don kam ban don ia ka jingshong suk shongsain, ban wanrah ia ka jingsuk kaba neh ha kane ka jylla ka sorkar ka khot ka wer ia ka seng HNLC ba ka jngkhang ka plie na ka bynta ban ia kren ia suk hapoh ka riti synshar jong ka Ri India.
Ka jylla Meghalaya ka dang don 76% ki khlaw ki btap, ban pynslur ia kane ka jingiada ia ki khlaw ka sorkar kala ai ka jingkyrshan ia ki 3000 ki kynhun bad ia ki riew shimet da ka pisa namar ba kila lah ban pynneh pynsah ia ka mariang haduh 55,000 hektar.
Ha kane ka sngi u Lat u la kren ruh hapoh ka iing dorkar ba ia ka iing dorbar jng ka KHADC bad JHADC la pynjlan sa hynriew bnai, la ong ba ka daw jong ka jingpynjlan ia ki iing dorbar jong kitei ki ar tylliki District Council kadei namar ba la leh ia ka jingpynwandur thymmai ia ki Konstitwensi.
Haba phai sha ka kam tih dewiong u Lat ka jylla u la ong ba ka sorkar kala shim bun ki latki lynti ban pynthikna ban pyndon kam ia ki buid saian katkum kane ka juk kaba mynta ban ioh tih dewiong biang. La ong ba ki don 17 tylli kiba la apply.
Na kitei kiba la apply 6 tylli kila dep ban ai ia ka kaiphot hakaba ia dei bad ka jinglong ka jaka bad na kine 4 tylli kiba la ioh ia ka jingmyjur na ka tand ba dei peit ia ki kam thih dewiong bad mynta dang ap ia ka jingbit ban ioh ia ka tnad khlaw, ynda la ioh ia ka jingbit na ka tnad khlaw kin sa ioh ban tih dewiong katkum kane ka juk mynta.
