Shillong, K.Lyngkot 11: Mynta ka sngi u James K Sangma myntri ba deipeit ia ka tnad ka koit ka khiah u la khot ia ka jingiakren bad ki nongtrei ka ka EMRI kiba dei ia ka 108, ha dien hynniew sngi ba kila pynlong ia ka jingsangeh trei kam ban dawa ba ka sorkar ka dei ban pynioh ia ka jingdawa ka jong ki nongtrei ka EMRI.
Ha dien ka jingiakren ba du myntri ka tnad ka koit ka khiah kaba la neh kumba 45 minit ei ei, ka kong Microlina Syiemlieh nongialam ki nongtrei ka EMRI kala iathuh ha ki lat pathai khubor ba u myntri u la ai ka jingkular ba ka sorkar kan weng noh ia ka kompeni GVK ha dien ka 31 Lber 2022 bala kut ka kontrak.
Haba ia dei bad ki nongtrei na ka liang jong u myntri la ong ba ka sorkar kan nym weng kam hynrei kin neh ha ka kam namar kila dei kiba la don lypa ha ka kam, kumno ban pyniaid pat ia kane ka EMRI ne kito ki kali 108 ka sorkar ka dang peit bniah, ka jingkular ka long ba kan nym don ka jingbeh kam.
La iathuh ba u myntri u la kular ba ia ki jingiakren mynta ka sngi ka tnad ka koit ka khiah kan ai da ka jingthoh mynta ka sngi hi, na ka liang jong ka sorkar kam kwah ban iohi ba kane ka jingshakri ia ki paidbah lyngbah kane ka 108 kan ktah kumba ka long mynta.
Ka kong Microlina kala ong, haba ia dei bad ka jingiakhih ki nongtrei kim sa shim ia ka rai ban weng ne bteng kan long halor ka jignthoh kaba kin sa ioh na ka sorkar kaba dei ka tnad ka koit ka khiah mynta ka sngi, lada ka jinghoh ka long kumba la ia kren ki saw eng ia ka jingiakhih.
Haba ia dei bad ka Tulop la ong ba ka sorkar kala phah ia ka pisa bad ka GVK kan sa pynlait ha ba kut jong mynta u bnai, ha kane ka sngi na ka liang jong ki nongialam seng bha lang kum ka HNYF kaba ia don lang, u bah Bless Dkhar la ong ba lada ka GVK kam siew lut ia kaei kaba ki nongtrei EMRI ki dei ban ioh ka seng kan khangtala iaka.
