Shillong, Jylliew 12: U bah Paul Lyngdoh EM ba dei peit ia ka lum khajna hapoh jong ka KHADC mynta ka sngi u la lum ia ka jingialang jong ki ophisar ban ia kren kumno ban pynbha ia ka jinglum ia ka khajna kaba dei na ka “Professional Tax”.
Haba kren ha ki lat pathai khubor ha dien ka jignialang u la ong ba la shem ba bun na ki briew kim siew ia kane ka khajna na kaba ki kamai katkum ka Meghalaya Professional Trade, Callings on Professional Tax, Act 1947 ia kaba la pynkylla.
Ha kane ka jingialang la shem ba kawei na ki daw kaba ki briew kim siew ia kane ka khajna ka long namar ba ka jingtrei kam jong ka KHADC kam long katkum kane ka jul kaba mynta namar khlem pyndon kam ia ki kor Komputer. Ban lah ban lum ia ka khajna ha ka rukom kaba dei la don kam ban pyndon kam ia ki juk IT ba mynta.
La iathuh ba na ka bynta jong u snem 1029-2020 kiba la siew ia ka Professional Tax ka dang long tang T.8.94 lak, ha ka jingshisha lada la siew lut baroh kan kot sha ka T.12 klur tyngka kane ka long na ka daw jong ka jingdkoh ha ka jingtrei kam hapoh ka tnad.
Haba ia dei bad kane ka KHADC kan hap ban phah jingtip sha kito ki briew katkum ki kyndon jong ka ain bad lada kim siew ki hap ban shah set phatok 6 bnai bad ka kuna kaba T.500 tyngka. La ong ba lada lah ban pynbeit yn sa lah ban weng ia ki jingbam sap ia kiba la jia mynshuwa kiba la thep ha ki account jong ki riew shimet.
