Shillong, Nailur 04: Ka Superintendent ki pulit jong ka East Khasi Hills District ka kong Claudia C Lyngwa mynta ka sngi kala iathuh ba ha kine ki ar sngi ki pulit kila ioh ban kurup droks haduh 1195 gram kaba mut shikilo shispah khyndai phewsan gram bad ka dor ha iew kala kot sha ka T.15 klur tyngka.
Haba kren ha ki lad pathai khubor mynta ka sngi la iathuh ba ha kane ka jingioh kurup ia u tei u droks la ioh ban kem ruh shiphew ngut ki briew kiba kynthup ia kiba na Shillong bad kum juh na Guwahati.
Ha kane ka jingioh kem ia kine ki nongkhaii droks, ki pulit kila shem ba ar ngut ki kurim kim tip kaei kaba u kurim jong ki u leh kim don jingtip ei ei bad u wei na kiba ki leit ban kem na iing ki shem ba don lang bad khun na dangrit kane kala ktah hynrei ki hap ban kem.
Ha dien ba ki pulit kila lah ban khang ia ka jingwan ki drok na ki thaiñ Manipur sha Meghalaya lyngba ka Silchar, ki nongkhaii droks kila wad ia ka lynti na Manipur sha Nagaland bad poi sha Guwahati bad ki nongkhaii na Meghalaya ki leit ban shim na Guwahati.
Ka kong Claudia kala ong ba mynta ka jingthoh pyrshah ia ki nongkhaii droks kan kham pynsuk namar ia ka jingpeit bniah ha ki Laboratory la lah ban leh hapoh ka IFSL kaba don ha Shillong, Mynshuwa haba ioh kem droks la hap ban phah sha Kolkatta, Hyderabad bad Chhattisgarh kane ka shim por da ki bun bun bnai.
