Shillong, Risaw 13: Ki shipai BSF kiba don ha khappud bad ka Bangladesh ha kane ka jylla Meghalaya ki long kiba peitngor ban pynthikna ba ki kam khaii beain sha Bangladesh kim dei ban ioh lat.
Ha kane ka jingpeitngor ia ka khappud ki shipai BSF kila ioh ban kurup 27 tylli ki masi katba ki nongkhaii beain ki dang thmu ban pynrung sha Bangladesh, kine ki masi kiba la ioh ban kurup ki dei na WJH bad EKH District.
Ki BSF kila ioh ruh ban kurup ia ki muid kiba la har ia ki ban phah sha Bangladesh hynrei ki BSF kiba la ap ktem kila ioh ban kurup noh ia ki katba ki briew kila ioh ban phet ha ka jingiongrein ka miet namar ka jingdon ki khlaw.
Kine ki masi kiba la ioh ban kurup la buh rieh ia ki sha khlaw da ki nongkhaii beain ban shallan sha Bangladesh, na ka liang jong ki BSF ha dien ba kila pyndep ia ki jingdon kam baroh kila aiti sha ki pulit ka jylla ba kin leh ia kaba don kam katkum ka ain.
