Shillong, Naiwieng 12: Ka Seng Hynniewtrep Youths’ Council- CEC kam lah ban shu sngap bad long tang ki nongpeit ia ka jingbymlah ka Sorkar ban pynbeit ia ki jingeh bad jingdawa ba shong nongrim jong ki Nongtrei ASHA ha kane ka Jylla.
Na ka liang ka Seng ka dawa ba ka Sorkar ka dei ban thaw ki lad ki lynti ban pynurlong ia ki jingdawa jong ki ASHA ban ioh ia ka jingsiew kaba biang katkum ka kam ba ki trei, ban kynthup ia ki hapoh ka MHIS na bynta ban ioh jingsumar ei bad kiwei kiwei ki jingdawa jong ki.
Ka HYC ka pynpaw ia ka Jingkyrshan kaba Pura jong ka Seng ia ka MAWU halor ka jingiakhih ka jong ki bad ngim lah ruh khlem da ai khublei bad sngewnguh ia ki ASHA halor ka jingtrei len lade ka jong ki ha ki jylli treikam kaba ki don khamtam eh ngim dei ban klet kumno ba ki len lade ha ka por ba ngi mad ia ka Khlam Kobid-19.
Ka seng HYC ka pynkynmaw ba dei ma ki kiba long kita ki Nongtur ba hakhmat ban iakhun pyrshah ia kane ka khlam. Ki lah ai ka jingshakri kaba Pura ia ki Nongshongshnong ha kato ka por bad ha man la ka sngi ha kaba iadei bad ka Koit ka khiah jong ki Nongshongshnong hi baroh.
Kumta, kum ki Nongshongshnong ruh ngi sngew dap ram ia ka jingshakri ba len lade ka jong ki bad lyngba kane ka Kyrwoh ngi khot ngi wer ia baroh ki dkhot ka Jaidbynriew, ki Dorbar Shnong bad kiwei ba kin kyrshan ia ki ASHA ha kane ka jingiakhih ka Jong ki.Ka seng ka kyntu ruh ia ka Sorkar ba kan pynbeit noh kloi ia kane ka kam namar Lada ki ASHA ki bteng ka jingiakhih, Kan ktah pat ia ki paidbah Nongshong shnong ka Jylla. Ka HYC kyntu ruh ia ka Sorkar ba kam dei ban pyntieng pynsmiej ia ki Nongtrei ASHA .
Ka sorkar kam dei ban weng kam Lada kim sangeh ka jingiakhih namar lada ka Sorkar ka bakla ban shim Rai bad weng kam ia ki ASHA kiba iakhih ban dawa ia la ka hok, na ka liang ka Seng ruh kam banse ban mih shakhmat bad iakhih pyrshah ia ka Sorkar Jylla, la ong u bah Roy Kupar Synrem President ka HYC seng kmie.
