Shillong, 
Jymmang 22: Ka seng JSU ka kwah ban buh jingkylli ia ka sorkar jylla, ” Hato ki shipai BSF bad ki Army bad kiwei kiba wan na kawei ka jylla, lah test ne em ia ki ha shuwa ba kin rung shapoh ka jylla Meghalaya?”.
U President ka seng JSU Shillong Circle, u samla Treiborlang R Suchen u lah ong ba dang shen lah ioh jingtip ba lah don ki shipai BSF ha Tripura kiba ioh ia kum une u khniang COVID 19 kat kum ka khubor ba lah ioh lum ha ka 6 tarik ,12 traik bad 14 tarik u bnai May ba lah don ki shipai BSF na Tripura kiba ioh ia une khniang.
Kumta ka seng ka kwah ban ai jingmut sha ka sorkar, ba kadei ban phah test ia ki shipai baroh kiba wan rung sha ka jylla ha kum kane ka por ba u COVID 19 u dang pur bha ha baroh ka pyrthei bad tang ha India marwei lah da ki lak ngut kiba lah ioh ia u bad da ki hajar kiba lah iap bad bun ruh ki kiba lah khiah.
Ka seng ka lah ong ba lada ka sorkar kam pat bthah ia ki ban test lah dei ban phah leh noh khamtam ia kito kiba dang shu rung shen bad kiban sa rung bad kine ki shipai baroh ba ki dei ban shim ia ka Primary Test ha ki jaka test ba lah buh kyrpang ha shuwa ban rung shapoh ka jylla.
U samla Treibor u lah ong, ba dang shen ha kine ki sngi u lah iohi da lajong ki khmat ba shikynhun ki shipai ki lah wan iew ha jaka iew paitbah hapoh sor Shillong bad lehse ki lah ban leit iew leit hat sha kiwei pat ki jaka hapoh ka jylla sha jaka kaba ki sah .
Ka seng ka lah ong ba lada jia ba ia kine ki kynhun shipai ym shym lah test ia ki kan buh kylla ia u paitbah ka jylla ha ka jingma namar ka don ka jingleit jingwan jong ki shipai bad ki ia thied ia pet ha iew ha hat bad ki nongdie jingdie.
Kumta na ka liang ka seng ka kyntu jur ia ka sorkar jylla ba kam dei ban kheiñ sting ia kane, wad lada ki lahdep ban test ia ki naki jaka ba ki wan hynrei dei ruh ban test ia ki shuwa ba kin rung sha ka jylla Meghalaya kumjuh.
