Shillong, Nailur 20: Ban bteng ia ka jingdawa ba ka sorkar ka dei ban weng kam shipor ia kito ki pulit kiba la shah kynnoh ba ki don kti ha kaba sait iap ia u bah Cheristerfield Thangkhiew bam kwai ha dwar u blei ki saw tylli ki seng ka FKJGP, KSU, RBYF bad ka HNYF mynta ka sngi kila pynlong ia ka jingiakhih shongkyllain mungor ha khmat u mot jong u Kiang Nangbah ha Barik.
U samla Lambokstarwell marngar president ka KSU haba kren ha kane ka jingialang ha kane ka jingiakhih shong kyllain mungor u la ong ba ki sur bapher bapher kiba la ialum lang myntaka sngi bad kane ka jingiakhih kala iaid shibnai lynter ha ka kyrteng ka sur ki nong Mawlai.
Haba ia dei bad ka jingshah siat iap u bah Cheris naduh ka 13 Nailar 2021, ka seng kala kren shai ba kane ka jingleh jong ka sorkar yn nym lah ban pdiang bad bad nym lah ban kubur lano lano ruh, kane ka kyrwah ba ki kam iasylla bad ka synia ka dei ban dam noh.
U samla Lambok, u la ong haba u kren ia kane ka pynkynmaw ba kum ka seng kala mat ia ki juh ki jingjia ha ki snem kiba mynshuwa ha kaba ki nongialam ka KSU kila shah dkhat jubor ha ki kuli jong ka sorkar, khlem da kem khlem da tian bishar, ka jingbishar da u kuli ka dei kaba ym lah ban pdiang, kane kim ong ba ka dei ka jingsynshar paidbah hynrei ka dei ka jingpyndon kam bakla ia ka bor ka iktiar kaba ki don.
Ka long ka khyllipmat kaba hap ban pynsngew bad buh ia ka jingkylli ia ka sorkar kaei kaba hap ban pynshai sha u paidbah ia kaei kaba ka sorkar ka dei ban leh nangne sha khmat, ka sur jong ki paidbah ka Bri-u-Hynniewtrep bapher bapher, na ki dong ki shnat bapher bapher laiohi ha kine ki sngi ki dawa ba ka sorkar ka dei ban sngap bad ban burom ia ka sur jong u paidbah.
Kumba ka long haduh mynta na ka liang jong u myntri rangbah ka jylla u Conrad K Sangma dang shen u la kren shai ban nym lah ban pynsangeh trei kam ban ai ia kata ka jingweng kam kaba shipor ia kito ki lai ngu ki heh pulit, kum ki kynhun ki pan ka jingpynshai kaei ka daw bym lah ban ai ia ka jingwengkam shipor.
Ka nongrim kaba ki dawa ban weng kam shipor ka long halor ka nongnrim ba kan nym don kano kano ka jingpynjah klet ia ki sabut ban ioh ia ka jingbishar kaba hap khnang ba kum kine ki jingjia kin nym jiashuh naneng sha khmat hapoh ka Bri-u-Hynniewtrep hi baroh kawei.
Bun sien bun wat haba iakren ia ki phang bapher bapher ba dei ban iaid da ka lynti jong ka jingiakhih paidbah, hynrei kumba ka long mynta la ioh ba ka sorkar, ba dei ka sorkar hi ka pyndom, dei ka sorkar hi kaba ai ding kaba la pynlong ia ka jingmut jingpyrkhat jong ki samla ba kin pyrkhat da kumwei pat ki lynti.
Khyndait sngi, la ioh ym lah ban tip la ka dei ka jingshisha ne dei tang ka jingpharep jong ki pulit ha kaba saw ngut ki samla kila shah kem na Mawiong ban kynnoh ban ong ba ki don ka jingthmu ban thaw pat sa kawei ka kynhun kieng atiar.
U President ka KSU u la buhka jingkylli sha ka sorkar, kat ba ki samla ki dang pyndon kam da u khulom hynrei la ai pynban da ki jingpyntyrha, ban ong saw ngut dang duna palat ba ioh leh ki samla ki hap ban shim da kiwei pat ki lynti kata dei ha ka bor jong ka sorkar ban pyrkhat nangne sha khmat ia kaei kaba dei ban leh.
Ha kane ka jingialang la ong ba ka phang jong u bah Cheris ka dei tang kawei ka mat, hynrei ym dei ban klat ia ka Inner Line Permit, ym dei ban klet ia u pud u sam, um dei ban klet ia ka phang ba ia dei bad ka Them Motor, ha u snem 2018 bun ki samla ki jaw ka snam bad ka sorkar kala thaw ia ka High Level Committee bad ka jingkylli ka long shno kala poi kata ka mat jong ka Them Motor.
Kum ka seng kam kwah ban iohi ba ka sorkar kan nym shu pynjem ia ka jingbitar, kaei kaba ki kwah ka long baki kwah ban iohi ia u soh ba ka sorkar kam shim nangne sha khmat, kum ki paidbah ki don ka hok ban pan ia ka jingkhein na ka sorkar, u president ka KSU u la ong ba to kin pynleit jingmut kaba ktah ia ka jaidbynriew kaba ktah ia ka imlang sahlang.
U samla Lambok u la kyntu ban sangeh ka jingiakynthoh sharum bad shaneng, kata don kam kum ki samla kiba shynrang, to buh sharud ia kata ka jingkwah burom, buh sharud ia kata ka jingkwah long ha khmat, to buh sha khmat ia ki mat jong ka jaidbynriew baroh kawei.
Ka seng KSU seng kmie baroh kawei bad ki saw tylli ki seng bhalang kan sa shong pyrkhat ha kine ki sngi, kum ka kynhun ki ai jingkyrshah kaba pura ia ki samla ka shnong Mawlai, ka sur ki nong Mawlai, ban pynkynmaw ba bun tylli ki met iap ki la ngam, labun tylli ki met iap kila kyllon ha ka jingialeh ha ki kuli jong ka sorkar.
Ka sorkar ka dei ban sngewthuh balei ki shim iaka lynti jong ka jingkieng atiar mano ba pynbor mano ba pyntyrha, ka sorkar kaba don hapoh ka jylla ka dei ban jubab ia kata, mynta ki ieng ha jan u mot jong u kiang nongbah sa peit khnam u thew shano lada bakla u kham un sa siat ia ka secretariat.
U President ka KSU u la ong ba ka jingiakhih ha kaba ia dei bad ka jingdawa ILP kan dang iaid bteng nangne sha khamt lada kane ka khlam COVID-19 kala sdang ban ailat, kaei kaba paw ka long ba ka sorkar pdeng kala khein dewthala ia ka jingdawa jong ka jaidbynriew baroh kawei.
Ka sorkar jylla kala shim ia ki ar tylli ki rai hapoh ka iing dorbar thawain ka jylla, kawei ka long haba ia dei bad ka jingdawa ban pynrung noh ia ka ktien khasi ha ka khyrngit kaba phara jong ka Riti synshar ka Ri India bad kawei ka dei ban pyntrei kam ia ka ILP ha kane ka jylla Meghalaya.
Kum ki seng bapher bapher kila leit ban ia kynduh ia u myntri kam poh iing ka sorkar pdeng ba u wan ha Shillong hynrei khlem kren wa tang shikyntien ruh um kren.
Kum ki samla kiba don ka jingkit khlieh ia ka ri bad ka jaidbynriew ba nym shong thait ban kren ia ka mat jong ka jiaidbynriew, kiwei kiba la kren ha kane ka jingialang ki long u bah Sadon Blah na ka HNYF, u bah D Khognsit na ka FKJGP.
