Shillong, Naitung 31: Ki paidbah nongrep kiba don hapdeng ka Ryngku kaba don ka wah Khasimara bad ka wah Dholai kila kynduh jigneh shibun namar ba kam shym don ka jingkieng iaid kjat lane ka sub-way haba shna ia ka jingkieng iaid kali, kane kala buh ia ki nongrep ka thain kaba hap hapoh jong ka Mawsyrnam Block ha pdeng ka jingeh kaba khraw.
U bah Odas Pdahkasiej President jong ka Hills Farmers Union jong ka Mawsynram Block, la ong ba ka long kaei kaei kaba sngewsih ban iohi ba ka tnad PWD Mawsynram Division kam shym la lah ban bthah ia u kontraktor ban shna ia ka subway lane ka jingiaid kjat ha ka wah Dholai ban iaid ki briew.
La ong ba haba jur ka slap bad kane ka wah ka dap um ki paidbah ki lah ban iaid na shiliang sha shiliang, wat ki khynneh skul ki hap kiba hap iaid lyngba kane ka wah ki hap ban pep skul noh namar bym don lynti.
Na ka liang jong ki nongrep ki hap ban kylliang kali bad la kit da ki briew na shiliang kawah sha shiliang ka wah ia ki marrep bad kane kala wah rah ia ka jingduhnong kaba khraw namar ka ktah ia ka dor jong ki marrep.
Haba ia dei bad kane ka jingeh jong ki paidbah na ka liang jong u president ka Hills Framers Union la ia kren bad u Executive Engineer jong ka PWD Davison Mawsynram hynrei haduh mynta kam shym don kano kano ka dak ban pynshna ia ka subway.
Ka seng HPU ka buh ka jingkylli ia u EE ka PWD Mawsynram hato ban shna jingkieng kam don katta ka jingmang pisa ban shna ia ka sub-way, kaei kaba kila tip ka long ba man ba shna jingkieng don ka mang pisa ban shna sub-way khnang ba ki paidbah kin iaid kjat bad ki kali ruh kum juh.
