Shillong, Iaiong 01: Ka Seng FKJGP Mawrynkneng Cirice ha ka 1 tarik Ïaiong ka la wan iakynduh ia u Myntri ka tnad ka Koit ka khiah halor ka jingiakynduh jingeh haba iadei bad ka Jingbym biang doctor Vertinary ha Mawrynkneng.
Haba kren bad ki nongthoh khubor na ka liang u Bah Ferdinand Mawrie General Secretary FKJGP Mawrynkneng Cirice u la ong la jingwan kynduh ia u Myntri ka tnad Vertinary ka dei halor ka Jingbym don ki Doctor Permanent ha katei ka Vertinary hospital namar u Doctor u hap ban peit bun tylli ki jaka.
Na ka liang u Myntri ka tnad Vertinary u la pynsngew ha ki nongialam jong ka FKJGP Mawrynkneng ba un sa pynkloi ia kane ka jingdonkam ban buh doctor Permanent ha katei ka Vertinary Dispensary.
Na ka liang u President jong ka FKJGP u Bah Brister Mawlong u la ong ka Jingbym don doctor Permanent ka la ktah shibun ia ka Mawrynkneng khamtam ia ki paidbah ba ri jingri bad ha juh ka por ruh ki dawai ka duna.
Shuh shuh u la ong na ka liang ka FKJGP Mawrynkneng ka kyntu ia ki bor pyniaid ka Vertinary ba kin pynbiang ia ki dawai khnang ba kan long ka jingiarap ia ki paidbah ba ri jingri.
u la ong ruh ka don ka farm jong ka sorkar ha Mawrynkneng , hynrei ka jingeh ka long ba ki paidbah ka thain Mawrynkneng kiba ri jingri ynda ki buh kyrteng ban ioh ia ki symbai sniang da ki Snem kim ioh re hynrei kita ki symbai sniang ki leit ai sha kiwei ki jaka .
Kumta ka Seng FKJGP ka kyntu ia ka sorkar ba ka Farm kaba don ha Mawrynkneng ka dei ban pynbiang shwa ia ki paidbah ka Mawrynkneng kiba ri jingri, kumta ka Seng kan ym shah da lei2 ruh ia ki symbai kiba mih na ka Farm Mawrynkneng ban rah sha kiwei ki jaka .
