Shillong, Iaiong 08:Ka Confederation of Ri Bhoi People (CoRP) hapoh ka jingialam u bah Gershome Hat vice president ryngkat u bah Ashok Khongsit Finance Secretary bad kiwei ki dkhot ha ka 5 tarik Iaiong, 2023 ka la kynduh ia u Symbud Myntri Rangbah ka Jylla bah Prestone Tynsong ha ophis treikam jong u.
Ha katei ka jingkynduh ka ka CoRP ka dawa ban kyntiew kyrdan noh ia ka Administratine Unit Patharkhmah sha ka Civil Sub-Division, ki paidbah ka thain ri Bhoi sepngi ki mad jingeh ban pyndep ia ki kam haduh Nongpoh namar ka la jngai bad ka jingsniew ka surok Umling-Patharkhmah.
Ka CoRP ka la kyntu ruh ban pynstet ia ka jingtrei ia ka jingtrei ia ka surok Umling- Patharkhmah kaba long u budlum ia ka roi ka par ki paidbah ka thain Ri Bhoi sepngi bad kumjuh ban pynbha ia ka jingkieng Dwarksuid namar ka buh jingeh ia ki paidbah nongleit nongwan ka thain.
Na ka liang Bah Tynsong ula ong, ka sorkar ka la shimkhia ban kyntiew kyrdan ia ka Administrative Unit Patharkhmah namar ka sngewthuh ia ka jingeh ki paidbah ka thain ri Bhoi sepngi namar ka la jngai na ka district head quarter na Nongpoh.
Ula iathuh ka tnat PWD ka kwah ban pyndep kloi ka jingtrei ia ka surok Umling-Patharkhmah kaba dangiaid mynta, kumjuh ka NHAI ka la iaid shakhmat ban khot tynder ban shna pynbha ia ka jingkieng Dwar Ksuid shen ka jingtrei ki lah ban sdang noh ha u bnai wan.
