Shillong, Nailur 27: Mynta ka sngi ka seng HANM na Ri Bhoi District kila ia kynduh ia u myntri kam bor ding u Abu Taher Mondal ha kaba kila ai ia ka jingthoh ban dawa na ka sorkar ba kam buh ia ka 132 KV Station ha Ri Bhoi District ban pynbiang ia ki kam bor ding elektrik.
Kumba ka long mynta ka bor ding elektrik ha Ri Bhoi District kam long kaba biang wat la ka District ka don haduh san tylli ki jaka pynmih bor ding, ka Umiam Power Station Sumer ka pynmih 36 MW, Sumer Power Station ka pynmih 20 MW, ka Kyrdem Kulai Power Station bad ka Nongkhyllem Power Station ki pynmih mar 60MW bad ka New Umtru Power Station ka pynmih 40MW.
Ha kane ka jingiakynduh ka HANM kala kdew ba haduh mynta ka Nongbah ka dang hap ban shaniah ha ka 33KV Umsning-Jyntru Power Line ka bym ia hap shuh mynta, ka Ri Bhoi District ka don 400 tylli ki shnong 25000 tam ki tnum iing, kumta la don kam ia ka 132 KV Station ha Ri Bhoi.
Ka Ri Bhoi District ka pynmih haduh 216 MW baroh, hynrei ka jinglip light kaba khah khah kala ktah kala ktah ia ki kam ki jam jong baroh bad kum juh ia ki ophis sorkar ki Bank bad kane kala pynslem ruh ban pyntrei ia ki kam pynroi.
Ka seng ka kyntu ia ka sorkar ba kan pyntrei noh ia ka 132 KV, ha Ri Bhoi, ban pynkhlian ia ka jingtrei kam jong ka MeECL, bad ban buh ia ka jaka ujor kaba ki paidbah ki lah ban ujor ha kaba ia dei bad ki jingeh ba ia dei bad ka bor ding eletrik.
Ha kane ka jingleit ia kynduh ia u myntri kam bor ding la lam khmat da u President ka seng HANM Ri Bhoi u bah Don Roy Kshiar ha ka jingiadon lang ki nongialam ka seng kmie bad kiwei kiwei ki nongkit kam jong ka seng na Ri Bhoi District.
